އިންޑޮނޭޝިއާގެ ސުލަވެސީ ރަށް ސަރަހައްދަށް 6.7 މެގްނިޓިއުޑްގެ ބާރުގަދަ ބިންހެލުމެއް އަތުވެއްޖެއެވެ.

މި ބިންހެލުން އައިސްފައިވަނީ މިއަދު ހެނދުނުގެ ވަގުތެއްގައެވެ. ބިންހެލުމުގެ އަސަރު އެންމެ ބޮޑަށް ކޮށްފައިވަނީ ސުލަވެސީގެ ޕަލޫ ސިޓީއާއި އެ ސަރަހައްދުގެ ވަށައިގެންވާ އެހެނިހެން ސަރަހައްދުތަކަށެވެ.

މި ބިންހެލުމުގެ މަރުކަޒު ހުރީ ޕަލޫއާ ގާތްގަނޑަކަށް 42 އާއި 46 ކިލޯމީޓަރު ދުރުމިނުގައި، 10 ކިލޯމީޓަރުގެ އަޑީގައެވެ.

މި ހާދިސާގެ ސަބަބުން ސަރަހައްދުގެ ރައްޔިތުންގެ މެދުގައި ބޮޑު ބިރުވެރިކަމެއް އުފެދި، ގިނަ ބަޔަކު ވަނީ އެމީހުންގެ ގެދޮރާއި އިމާރާތްތަކުން ނުކުމެ މަގުތަކަށް ޖަމާވެފައެވެ.

އިންޑޮނޭޝިއާގެ ބީއެމްކޭޖީ އިން ހާމަކޮށްފައިވާ ގޮތުގައި، މި ބިންހެލުމާ ގުޅިގެން މިވަގުތަށް ސުނާމީގެ ނުރައްކަލެއް ނެތެވެ. އަދި ބިންހެލުމުގެ ސަބަބުން ލިބުނު ގެއްލުންތަކުގެ ތަފުސީލުތައް ކަމާބެހޭ ފަރާތްތަކުން މިހާރު ދަނީ ބަލަމުންނެވެ.

މިހާތަނަށް މީހަކަށް އަނިޔާވިކަމުގެ ނުވަތަ ބޮޑު އިމާރާތެއް ވެއްޓުނުކަމުގެ ރަސްމީ ރިޕޯޓެއް ލިބިފައިނުވި ނަމަވެސް، ގެތަކަށާއި އިމާރާތްތަކަށް ލޮޅުންތަކުގެ އަސަރު ކޮށްފައިވާކަމަށް ރިޕޯޓުތައް ބުނެއެވެ.

ސަރަހައްދުގެ އޮފިޝަލުން ވަނީ ރައްޔިތުން ހަމަޖެހުން ގާއިމުކޮށް، ހަމައެކަނި ރަސްމީ ފަރާތްތަކުން ދޭ މައުލޫމާތުތަކަށް ސަމާލުކަން ދިނުމަށާއި، ސޯޝަލް މީޑިއާގައި ފެތުރޭ ކަށަވަރު ނުކުރެވޭ ވާހަކަތަކަށް ނުހެއްލުމަށް އިލްތިމާސްކޮށްފައެވެ.

އަދި އާދަޔާ ހިލާފަށް ބާރުގަދަ ލޮޅުންތަކެއް އައިސްފާނެތީ އެކަމަށް ސަމާލުވެ ތިބުމަށްވެސް ވަނީ އަންގާފައެވެ.