ބްރެޒިލްގައި މިހާރު ކުރިއަށްދާ އެސްޓްރާޒެނެކާ އަދި އޮޮކްސްފޯޑުން އުފައްދާފައިވާ ވެެކްސިންގެ ތަހުލީލުތަކުގެ ބައިވެރިންގެ ތެރެއިން މީހަކު މަރުވެއްޖެކަމަށް ބްރެޒިލްގެ ސިއްހަތާ ބެހޭ އިދާރާ އަންވިސާ އިން ހާމަކޮށްފިއެވެ.

ވެެކްސިންގެ ތަހުލީލުތަކުގެ ބައިވެރިންގެ ތެރެއިން މީހަކު މަރުވެއްޖެކަމަށް މައުލޫމާތު ލިބުނު ނަމަވެސް "މެޑިކަލް ކޮންފިޑެންޝިއަލިޓީގެ" ދަށުން އިތުރު މައުލޫމާތު ލިބިފައި ނުވާކަމަށްވެސް އަންވިސާ އިން ހާމަކޮށްފައިވެއެވެ.

ވެކްސިން ދިން މީހަކު މަރުވިކަން ޔަގީން ކޮށްދިން ނަމަވެސް މިވެކްސިންގެ ތަހުލީލުތައް ބްރެޒިލްގައި ކުރިއަށް ގެންދާ ބްރެޒިލްގެ ފެޑަރަލް ޔުނިވަރސިޓީ އޮފް ސައޯ ޕައުލޯ އިންވެސް މިކަމާގުޅޭ އިތުުރު މައުލޫމާތުތަކެއް ހާމަކޮށްފައެއް ނުވެއެވެ. އަދި މިހާދިސާ އަށް ފަހުވެސް ވެކްސިންގެ ތަހުލީލުތައް ބްރެޒިލްގައި ކުރިއަށް ގެންދެވޭނެކަމަށްވެސް ބްރެޒިލްގެ ފެޑަރަލް ޔުނިވަރސިޓީ އޮފް ސައޯ ޕައުލޯ އިން ހާމަކޮށްފައިވެއެވެ.

ބްރެޒިލްގައި، އެސްޓްރާޒެނެކާ އަދި އޮޮކްސްފޯޑުން އުފައްދާފައިވާ ވެެކްސިންގެ ތަހުލީލުތަކުގެ އިތުރުން ޗައިނާގެ ސިނޮވަކް ވެކްސިންގެ ތަހުލީލުތައްވެސް ދަނީ ކުރިއަށެވެ.

ދުނިޔޭގައި އެންމެ ގިނަ ބަޔަކަށް ކޮވިޑް ޖެހިފައިވާ ގައުމުތަކުގެ ތެރެއިން ލިސްޓުގެ އެންމެ ކުރީގަ އުޅޭ އެމެރިކާ އަދި އިންޑިޔާ އަށްފަހު އެންމެ ގިނަބަޔަކު ކޮވިޑް އަށް ޕޮޒިޓިވް ވެފައިވަނީ ބްރެޒިލްގައެވެ. މިގޮތުން، ބްރެޒިލްގައި މިހާތަނަށް 5.2 މިލިއަނަށް ވުރެ ގިނަ މީހުންނަށް ކޮވިޑް ޖެހިފައިވާއިރު، މިހާތަނަށް 154،000 އަށްވުރެ ގިނަ މީހުންވަނީ ކޮވިޑް ޖެހިގެން މަރުވެފައެވެ.