އިމާމުކަމާއި، ބަންގިގޮވުމާއި، އަދި ޚުޠުބާ ކިޔުމުގެ މަސްޢޫލިއްޔަތަކީ ދީނީ ގޮތުން މަތިވެރި ޝަރަފެއް ކަމަށާއި، ޚަޠީބުންނަކީ ފޭރާން އެޅުމާއި ސުލޫކުގެ ގޮތުން މުޖުތަމަޢަށް ނަމޫނާ ބަޔަކަށް ވާންޖެހޭނެ ކަމަށް އިސްލާމިކް މިނިސްޓަރު ޑރ. މުޙައްމަދު ޝަހީމް ޢަލީ ސަޢީދު ވިދާޅުވެއްޖެއެވެ.

މިނިސްޓަރު މިހެން ވިދާޅުވީ "ޒުވާން ޚަޠީބުން" ތަމްރީނުކުރުމުގެ ޕްރޮގްރާމުގެ 4 ވަނަ ބުރު ނިންމުމަށް ބޭއްވި ރަސްމިއްޔާތުގައި ވާހަކަދައްކަވަމުންނެވެ. މި ރަސްމިއްޔާތުގައި މިނިސްޓަރު ފާހަގަކުރެއްވި ގޮތުގައި، ރާއްޖޭގެ ބައެއް ރަށްރަށުގައި އިމާމުން މަދުވުމާއި ހުކުރު ދުވަހު ޚުޠުބާ

ކިޔާނެ މީހުން ނެތުމުގެ މައްސަލަ އަދިވެސް ދަނީ ކުރިމަތިވަމުންނެވެ. އެހެންކަމުން، މިފަދަ ތަމްރީނުތަކުގެ އެހީގައި އެ މައްސަލައަށް ދާއިމީ ޙައްލެއް ހޯދުމަކީ މިނިސްޓްރީން އެންމެ އިސްކަމެއްދޭ އެއް މަސައްކަތް ކަމަށް ވިދާޅުވިއެވެ.

ޚަޠީބުންނަށް ނަޞޭޙަތްތެރިވަމުން މިނިސްޓަރު ވިދާޅުވީ، ގަޑިއަށް ކަމޭހިތުމާއި ފަރުވާތެރިވުމަކީ ކޮންމެހެން ބޭނުންތެރި ކަމެއް ކަމަށެވެ. އަދި ޚުޠުބާ ކިޔުމުގެ ކުރިން އެކަމަށް ރަނގަޅަށް ތައްޔާރުވެ ފަރިތަކުރުމަށް މިނިސްޓަރު އިރުޝާދު ދެއްވިއެވެ. "ޚުޠުބާ ކިޔާ އިރު ޙަދީޘްތަކާއި އާޔަތްތައް ރީތިކޮށް ތަޖުވީދުގެ މަގުން ކިޔަން އާދަކުރަންވާނެ،" ޑރ. ޝަހީމް ވިދާޅުވިއެވެ.

މީގެ އިތުރުން، މިސްކިތްތަކުގައި ޤާއިމުކުރާ ޖަމާޢަތްތަކަކީ އިސްލާމީ އުއްމަތުގެ ބަދަހިކަމާއި އަޚުވަންތަކަން ރަމްޒުކޮށްދޭ އެންމެ މުހިންމު ބަހާކަން މިނިސްޓަރު ފާހަގަކުރެއްވިއެވެ. އެފަދަ މަތިވެރި ޖަމާޢަތްތަކެއްގެ ކުރިއަށް ނުކުމެ އިސްކޮށް ހުރުމުގެ ފުރުޞަތަކީ ކީރިތި ރަސޫލާ ﷺ ވެސް އެބަޔަކަށް ހެޔޮ ވިސްނުން ދެއްވުމަށް އެދި ދުޢާކޮށްދެއްވާފައިވާ ބޮޑު ޝަރަފެއްކަން މިނިސްޓަރު ހަނދާންކޮށްދެއްވިއެވެ.

މި ޕްރޮގްރާމުގެ 4 ވަނަ ބުރުގައި ރާއްޖޭގެ އެކި ކަންކޮޅުތަކުން 82 ޒުވާނަކު ތަމްރީނު ފުރިހަމަކޮށްފައިވެއެވެ. މި މަޝްރޫޢުގެ ދަށުން މިހާތަނަށް ޖުމްލަ 600 އަށްވުރެ ގިނަ ޒުވާން ޚަޠީބުން ވަނީ ތަމްރީންވެފައެވެ.