ދިވެހި ޒުވާނުންގެ ހުރި އުންމީދާއި ޖޯޝާމެދު ސުވާލުއުފެއްދުމުގެ ބަދަލުގައި، އެމީހުންނަށް ހުރި ފުރުޞަތުތައް ފަހިކޮށްދިނުމަށް ސީރިއަސްކޮށް ބެލުމަށް އިދިކޮޅު އެމްޑީޕީގެ ރައީސް އަދި ކުރީގެ ޚާރިޖީ ވަޒީރު ޢަބްދުﷲ ޝާހިދު ގޮވާލައްވައިފިއެވެ.

ޝާހިދު މިކަމަށް ގޮވާލެއްވީ ​ބައިނަލްއަޤްވާމީ ޒުވާނުންގެ ދުވަހުގެ މުނާސަބަތުގައި ދެއްވި މެސެޖެއްގައެވެ. ޝާހިދު ވަނީ ދިވެހި ޒުވާނުންގެ ކިބައިގައިވާ ޤާބިލުކަމާއި ހުނަރުވެރިކަމަށް އަލިއަޅުވާލައްވާފައެވެ. އެގޮތުން ދިވެހި ޒުވާނުންނަކީ "އުންމީދީ، އީޖާދީ އަދި ޤައުމަށް ޚިދުމަތްކުރުމަށް ތައްޔާރަށް ތިބި ބައެއް" ކަމަށް ޝާހިދު ސިފަކުރެއްވިއެވެ.

​ މީގެ އިތުރުން ޒުވާނުންގެ މުސްތަޤްބަލް ބައްޓަންކުރާނެ ރަނގަޅު ވަޒީފާއާއި އެކަށީގެންވާ މަގެއް ނުފެނި ދަތިތަކާ ކުރިމަތިލާންޖެހޭކަން ފާހަގަކުރައްވަމުން، ޝާހިދު ވިދާޅުވީ ޒުވާނުންނަށް ދިމާވާ ގޮންޖެހުންތަކުގެ އަސްލަކީ އެމީހުންގެ އުންމީދެއް ނެތުން ނޫން ކަމަށާއި، އެއީ ނިޒާމީ ގޮތުން ހުރި ހުރަސްތައް ކަމަށެވެ.

​"ގިނަ ޒުވާނުންތަކަކަށް އެމީހުންގެ މުސްތަޤްބަލް ބައްޓަންކުރާނެ ރަނގަޅު މަގެއް ނުފެނި ދަތިތަކާ ކުރިމަތިލާންޖެހޭނަމަ، އެމީހުންގެ ހުރި އުންމީދާމެދު ސުވާލުއުފެއްދުމުގެ ބަދަލުގައި، އަޅުގަނޑުމެން ބަލަންވީ އެމީހުންނަށް ހުރި ފުރުޞަތުތަކާމެދު ސީރިއަސްކޮށެވެ." ޝާހިދު ވިދާޅުވިއެވެ.

​ދިވެހިރާއްޖޭގެ ޒުވާނުންނަށް އޮތް އިތުބާރު އާކުރައްވަމުން، އެމްޑީޕީގެ ރައީސް ވަނީ ޤައުމަށް އުޖާލާ މުސްތަޤްބަލެއް ބިނާކޮށްދިނުމުގެ ޤާބިލުކަން ޒުވާނުންގެ ކިބައިގައިވާކަމާމެދު ފުރިހަމަ ޔަޤީންކަން މިއަދުވެސް އޮތްކަން ހާމަކުރައްވާފައެވެ.

​"ބައިނަލްއަޤްވާމީ ޒުވާނުންގެ ދުވަހު، އަޅުގަނޑުގެ އިތުބާރު އަދިވެސް އޮތީ އަޅުގަނޑުމެންގެ ޒުވާނުންނާއި، އެމީހުންނަށް އަޅުގަނޑުމެންގެ ޤައުމަށް ބިނާކޮށްދެވޭނެ މުސްތަޤްބަލާމެދުގައެވެ." ޝާހިދު އިތުރަށް ވިދާޅުވިއެވެ.