ބޮޑުތަކުރުފާނު ކުރެއްވި މަތިވެރި ޖިހާދަކީ ދިވެހިންގެ ހިތްވަރާއި ކެރުންތެރިކަން ހާމަކޮށްދޭ ފުރިހަމަ ނަމޫނާއެއް ކަމުގައި ރައީސުލްޖުމްހޫރިއްޔާގެ އަނބިކަނބަލުން މެޑަމް ސާޖިދާ މުހައްމަދު ވިދާޅުވެއްޖެއެވެ.

މިއަހަރުގެ ގައުމީ ދުވަހުގެ މުނާސަބަތުގައި ސޯޝަލް މީޑިއާ މެދުވެރިކޮށް ފޮނުއްވި ތަހުނިޔާގެ މެސެޖެއްގައި ފަސްޓްލޭޑީ ވިދާޅުވީ، ބޮޑުތަކުރުފާނު ކުރެއްވި ޖިހާދުން ރަމްޒުކޮށްދެނީ ދިވެހިންގެ މެދުގައި އޮތް ބަދަހި އެއްބައިވަންތަކަމާއި ސާބިތު އަޒުމް ކަމަށެވެ.

އަދި ދިވެހި ގައުމުގެ މިނިވަންކަމުގެ ދިފާޢުގައި ގުރުބާނީތަކެއް ވެވަޑައިގަތް އަގުހުރި ބަތަލުންގެ ޒިކުރާ އާކުރައްވަމުން، އެކަމަނާ ވަނީ ގައުމީ ދުވަހުގެ އިހްލާސްތެރި ތަހުނިޔާ ހުރިހާ ދިވެހި ރައްޔިތުންނަށް އަރިސްކުރައްވާފައެވެ.

ބޮޑުތަކުރުފާނުގެ ޤައުމީ ޖިހާދަކީ، ދިވެހީންގެ ކެރުމާއި ހިތްވަރު، އެއްބައިވަންތަކަމާއި ޢަޒުމު ވަރުގަދަކަމުގެ ރީތި މިސާލެއް. ދިވެހި ޤައުމުގެ މިނިވަންކަމުގެ ޙައްޤުގައި ޖިހާދުކުރެއްވި އަގުހުރި ބަޠަލުންގެ ޒިކުރާ އައުކުރަމުން މި އުފާވެރި ޤައުމީ ދުވަހުގެ ތަހުނިޔާ ދަންނަވަން. pic.twitter.com/yw959aecFc

— First Lady Sajidha Mohamed (@sajidhaamohamed) August 14, 2026

ކޮންމެ އަހަރެއްގެވެސް ރަބީޢުލްއައްވަލް މަހުގެ ފުރަތަމަ ދުވަސް ގައުމީ ދުވަހުގެ ގޮތުގައި ފާހަގަކުރަމުން އަންނަނީ ހިޖުރީގޮތުން 981 ވަނަ އަހަރުގެ ރަބީޢުލްއައްވަލް މަހުގެ ފުރަތަމަ ދުވަހު ޕޯޗުގީޒުންގެ އަޅުވެތިކަމުން ދިވެހިރާއްޖެ ސަލާމަތްވެ، ލިބުނު މަތިވެރި ނަސްރާއި ފަތަހަ އާ ގުޅުވައިގެންނެވެ.

ގައުމީ ދުވަސް ފާހަގަކުރުމުގެ އެންމެ ބޮޑު މަގްސަދަކީ، ޕޯޗުގީޒުންގެ އަޅުވެތިކަމުން ދިވެހިރާއްޖެ ސަލާމަތްކުރައްވައި، އައްސުލްޠާން ޣާޒީ މުޙައްމަދު ތަކުރުފާނުލް އަޢުޒަމް ސިރީސަވާދީއްތަ މަހާރަދުން ހޯއްދަވައިދެއްވި މަތިވެރި މިނިވަންކަމުގެ ހަނދާންތައް އައުކޮށް، އެ މަތިވެރި ޖިހާދުން އިބުރަތް ހާސިލުކުރުމެވެ.