އެމެރިކާގެ ރިޔާސީ އިންތިހާބުގައި މިހާތަނަށް 70 މިލިއަން މީހުން ވޯޓުލައިފިކަމަށް ނޫސްތަކުގައި ރިޕޯޓުކޮށްފިއެވެ.

ނޫސްތަކުން ރިޕޯޓުކޮށްފައިވާގޮތުން، ނޮވެމްބަރު 3 ގެ ކުރިން ޕޯސްޓު މެދުވެރިކޮށް ނުވަތަ ވޯޓުލުމަށް ހާއްސަކުރެވިފައިވާ ވޯޓިން ބޫތުތަކުގެ ބޭނުންކޮށްގެން ޕްރީ ވޯޓިންގް ކުރިއަށް ގެންދެވޭއިރު، މިހާތަނަށް 70 މިލިއަން މީހުން އެމެރިކާގެ ރިޔާސީ އިންތިހާބުގައި ވޯޓުލައިފައިވެއެވެ.

މިއީ 2016 ވަނަ އަހަރު ވޯޓުލީ ޖުމްލަ އަދަދު މީހުންގެ ދެގުނަ އިތުރުވުމެކެވެ. ރިޔާސީ އިންތިހާބުގައި ވޯޓު ލުން ނޮވެމްބަރު ތިނަކާ ހަމައަށް ކުރިއަށް ދާއިރު، މި އަދަދު ބޮޑުތަނުން އިތުރުވުމަކީ އެކަށީގެންވާ ކަމެއް ކަމަށްވެސް ގިނަ ބަޔަކު ލަފާކޮށްފައިވެއެވެ.

މިގޮތުން މިއަހަރުގެ ރިޔާސީ އިންތިހާބުގައި އެމެރިކާގެ 150 މިލިއަން މީހުން ވޯޓުލާނެ ކަމަށް، ރިޔާސީ އިންތިހާބުގެ ކަންކަމުގައި އިސްކޮށް ހަރަކާތްތެރިވާ، ޔުނިވަރސިޓީ އޮފް ފްލޮރިޑާގެ ޕްރޮފެސަރ މައިކަލް މެކްޑޮނަލްޑް ލަފާކުރައްވާފައިވާކަމަށް މީޑިއާގައި ހާމަކޮށްފައިވެއެވެ. 150 މިލިއަން މީހުންނަކީ އެމެރިކާގައި ވޯޓު ލުމުގެ ހައްގުލިބިފައިވާ މީހުންގެ ތެރެއިން 65 އިންސައްތަ މީހުންނެވެ.

އެމެރިކާގެ ރިޔާސީ އިންތިހާބުގެ އެންމެ ފަހުގެ ޚަބަރުތައް ބުނާގޮތުން މި އިންތިހާބުގައި 4 ކެންޑިޑޭޓަކު ވާދަ ކުރައްވާއިރު އެންމެ ކުރީގައި އުޅޭކަމަށް ލަފާ ކުރެވެނީ ޖޯ ބައިޑެން އަދި މިހާރުގެ ރައީސް ޑޮނަލްޑް ޓްރަމްޕެވެ.