ފިލިޕީންސް އަށް އެރި ބާރުގަދަ ތޫފާނުގައި މިހާތަނަށް ހަތަރު މީހަކު މަރުވެއްޖެ ކަަމައް ފިލިޕީންސްގެ އިދާރާތަކުން ހާމަކޮށްފިއެވެ.

ފިލިޕީންސްގެ އިދާރާތަކުން ހާމަކުރާގޮތުގައި މިހާތަނަށް ފިލިޕީންސްގެ އާބާދީގެ 19 މިލިއަނާއި 35 މިލިއަނާ ދެމެދުގެ އަދަދެއްގެ މީހުންނަށް މިތޫފާނުގެ އަސަރު ވަނީ ކޮށްފައެވެ. އަދި މިތޫފާނުގެ ސަބަބުން ދިމާވި އެކި ހާދިސާތަކުގައި 4 މީހަކު މަރުވެފައިވެސްވެއެވެ.

"ޓައިފޫން ގޮނި"ގެ ނަމުން ނަންދެވިފައިވާ މިބާރުގަދަ ތޫފާނަކީ 2013 ވަނަ އަހަރަށް ފަހު ފިލިޕީންސް އަށް ކުރިމަތިވި އެންމެ ބޮޑު ކާރިސާއެވެ. 2013 ވަނަ އަހަރުގެ ތޫފާނުގައި 6،300 މީހުން މަރުވެފައިވެއެވެ.

މިތޫފާނުގެ ސަބަބުން ފެންބޮޑުވެ، ވައިގަދަ ވުމާއި އިމާރާތްތައް ވެއްޓި، ބިންގަނޑު ކަނޑައިގެން ދިއުން ފަދަ ހާދިސާތައް ކުރިމަތިވެފައިވެއެވެ. މީގެ އިތުރުން ފިލިޕީންސްގެ ގިނަ އަވަށްތަކަކުން ކަރަންޓު ކެނޑި، މުވާސަލާތީ ހިދުމަތްތަކަށްވެސް ވަނީ ބުރޫ އަރާފައެވެ.

ތޫފާން "ޓައިފޫން ގޮނި" މިހާރު ދަތުރު ކުރަމުން ދަނީ ފިލިޕީންސްގެ ދެކުނުގެ ސަރަހައްދުތަކާ ދިމާއަށެވެ. މި ތޫފާން ދަތުރު ކުރަމުން ދާވަރަކަށް ތޫފާނުގެ އަސަރު ކުޑަ ވިނަމަވެސް އަދިވެސް ނުރައްކާ އޮތްކަމަށް ފިލިޕީންސްގެ އިދާރާތަކުން ހާމަކޮށްފައިވެއެވެ.

މިތޫފާނުގެ ސަބަބުން މިހާތަނަށް ފިލިޕީންސްގެ ހާހެއްހާ މީހުންނަ އަމިއްލަ ގެދޮރު ދޫކޮށް ދާންޖެހިފައިވެއެވެ.