އިނގިރޭސިވިލާތުގައި ކޮވިޑް ޖެހުނު މީހުންގެ ޖުމްލަ އަދަދު އެއް މިލިއަނަށް އެރުމާއެކު އެގައުމު އަލުން ލޮކްޑައުން ކުރުމަށް އިނގިރޭސި ވިލާތުގެ ބޮޑުވަޒީރު ބޮރިސް ޖޮންސަން އަންގަވައިފިއެވެ.

މީޑިޔާތަކަށް މައުލޫމާތު ދެއްވާ ލޮކްޑައުން އިއުލާން ކުރަށްވަމުން ބޮޑުވަޒީރު ވިދާޅުވީ މިފަހަރު އިނގިރޭސި ވިލާތް ލޮކްޑައުން ކުރާނީ އެއްމަސް ދުވަހަށް ކަމަށެވެ. މިގޮތުން މި ލޮކްޑައުންގެ މުއްދަތު ކުރިއަށްދާނީ ޑިސެމްބަރު މަހުގެ ދެވަނަ ދުވަހާ ހަމައަށް ކަމަށްވެސް ބޮރިސް ޖޮންސަން ވަނީ ވިދާޅުވެފައެވެ.

އިނގިރޭސި ވިލާތް ލޮކްޑައުން ކުރި ނަމަވެސް ޒަރޫރީ ބޭނުންތަކަށް ބޭނުންވާ ތަކެތި ވިއްކާ ފިހާރަތައް ހުޅުވުމަށް ހުއްދަދެވޭނެއެވެ. މީގެ އިތުރުން ލޮކްޑައުންގެ މުއްދަތުގައި ރެސްޓޯރެންޓްތައް ހުޅުވިފައި ހުންނާނީ ހަމައެކަނި ޓޭކްއަވޭ ކުރުމަށެވެ.

އިނގިރޭސިވިލާތުގައި ކޮވިޑް ޖެހޭ މީހުން ގިނަވެ ލޮކްޑައުންގެ ހާލަތަށް އަނބުރާ ދާއިރު، ކޮވިޑް ޖެހިގެން އެންމެ ގިނަމީހުން މަރުވި ގައުމުތަކުގެ ލިސްޓުން ފަސް ވަނައިގައި އިނގިރޭސިވިލާތް ހިމެނެއެވެ. އިނގިރޭސިވިލާތުގެ ކުރިއަށް މިލިސްޓްގައި ހިމެނެނީ އެމެރިކާ، ބްރެޒިލް، އިންޑިޔާ އަދި މެކްސިކޯ އެވެ.

އިނގިރޭސިވިލާތުގައި މިހާތަނަށް އެއް މިލިއަނަށް ވުރެއް ގިނަމީހުން ކޮވިޑަށް ޕޮޒިޓިވް ވެފައިވާއިރު، 46،000 އަށް ވުރެ ގިނަ މީހުންވަނީ ކޮވިޑް ޖެހިގެން މަރުވެފައެވެ.