ގދ. ގައްދޫގެ ސިއްޙީ ނިޒާމު އިތުރަށް ހަރުދަނާކޮށް، ފެންވަރު ރަނގަޅު ޚިދުމަތްތަކެއް ފޯރުކޮށްދިނުމުގެ ގޮތުން އެ ރަށުގައި އަލަށް އިމާރާތްކުރާ 30 އެނދުގެ ޒަމާނީ ހޮސްޕިޓަލްގެ އަމަލީ މަސައްކަތް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) އިން ރަސްމީކޮށް ފަށައިފިއެވެ.

މި މަޝްރޫޢުގެ ދަށުން ގައްދޫގައި ގާއިމުކުރުމަށް ހަމަޖެހިފައިވަނީ ހަތަރު ފަންގިފިލާގެ ޖާގަ ތަނަވަސް، 30 އެނދުގެ މައި ހޮސްޕިޓަލް އިމާރާތެކެވެ. މީގެ އިތުރުން، ހޮސްޕިޓަލުގެ ޚިދުމަތްތައް ފުރިހަމަކަމާއެކު ދިނުމަށްޓަކައި 2،563 އަކަފޫޓުގެ އެއް ފަންގިފިލާގެ ސާވިސް ބްލޮކަކާއި، މުވައްޒަފުންނަށް ޚާއްޞަކޮށްގެން 3،573 އަކަފޫޓުގެ ދެ ފަންގިފިލާގެ އެކޮމޮޑޭޝަން ބްލޮކެއް ވެސް މި މަޝްރޫޢުގެ ދަށުން ތަރައްޤީ ކުރެވިގެންދާނެއެވެ.

ޖުމްލަ 11.7 މިލިއަން ރުފިޔާގެ މި ބޮޑު މަޝްރޫޢަކީ 600 ދުވަހުގެ މުއްދަތެއްގެ ތެރޭގައި ނިންމުމަށް އެމްޓީސީސީއާ ހަވާލުކޮށްފައިވާ މުހިންމު މަސައްކަތެކެވެ.

މި މަޝްރޫޢު ނިމި، ހޮސްޕިޓަލުން ޚިދުމަތް ދޭން ފެށުމުން ގައްދޫގެ ރައްޔިތުންގެ އިތުރުން ކައިރި ރަށްރަށުގެ ރައްޔިތުންނަށް ވެސް ފެންވަރު ރަނގަޅު ޞިއްޙީ ޚިދުމަތްތައް ހޯދުމުގައި ބޮޑެތި ލުއިފަސޭހަތަކެއް ލިބިގެންދާނެއެވެ. އަދި ޞިއްޙީ ފަރުވާއަށް އެހެން ސަރަޙައްދުތަކަށް ކުރަންޖެހޭ ދަތުރުތަކަށް ބޮޑު ހައްލެއް ލިބި، ސަރަޙައްދީ ޞިއްޙީ ޚިދުމަތުގެ ފެންވަރު އައު އުސްމިނަކަށް ވާސިލުވެގެންދާނެ ކަމަށް ސަރުކާރުން ބުނެއެވެ.