ޢިމާރާތްކުރުމާއި މަގުކޮނުމުގެ މަސައްކަތްތައް ކުރިއަށްގެންދަވާ ހުރިހާ ފަރާތްތަކުންވެސް މިހާރަށްވުރެ ބޮޑަށް ޒިންމާދާރުވެ، ބިމުގެ އަޑީގައިވާ ކަރަންޓު ވިއުގައަށް އެއްވެސް ގެއްލުމެއް ނުވާނޭހެން މަސައްކަތްތައް ރާވައިގެން ކުރިއަށް ގެންދިއުމަށް އިލްތިމާސްކޮށްފިއެވެ.

މިފަދައިން އިލްތިމާސްކޮށްފައިވަނީ ހުޅުމާލޭގައި ތަކުރާރުކޮށް މަގުކޮނުމުގެ ތެރޭގައި ކަރަންޓު ކޭބަލްތަކަށް ގެއްލުންވެ، ރައްޔިތުންނަށް ދަތިތަކާ ކުރިމަތިލާން ޖެހިފައިވާ ދަނޑިވަޅެއްގައެވެ.

އެގޮތުން، ހުޅުމާލޭގެ ފުރަތަމަ ފިޔަވަހިން އިއްޔެ ކަރަންޓުގެ ޚިދުމަތް މެދުކެނޑެން މެދުވެރިވީ، އެ އަވަށުގެ ކުރެދިމާ ހިނގުމުގައި އަމިއްލަ ފަރާތަކުން ކުރިއަށްގެންދިޔަ ޢިމާރާތްކުރުމުގެ މަސައްކަތެއްގެ ތެރެއިން ބިންކޮނުމުގެ ތެރޭގައި ހައިވޯލްޓޭޖް ކޭބަލަކަށް ގެއްލުންވުމާ ގުޅިގެންނެވެ.

މީގެ އިތުރުން، މިދިޔަ ބުރާސްފަތި ދުވަހުވެސް ހަމަ މިފަދަ ހާދިސާއެއް ހިނގައި، ހުޅުމާލެ ފުރަތަމަ ފިޔަވަހީގެ ބައެއް ސަރަޙައްދުތަކުން ވަނީ ކަރަންޓުގެ ޚިދުމަތް ކެނޑިފައެވެ.

ކައިރިކައިރީގައި މިފަދަ ހާދިސާތައް ތަކުރާރުވެ، ކަރަންޓުގެ ވިއުގައަށް ބޮޑެތި ގެއްލުންތައް ލިބި ޚިދުމަތް މެދުކެނޑެމުންދާތީ، އެކަމުގެ ސަބަބުން ޢާންމު ރައްޔިތުންނަށް އިންތިހާއަށް ދަތިތަކާ ކުރިމަތިލާންޖެހޭތީ ސްޓެލްކޯއިން ވަނީ އެކަމުގެ ކަންބޮޑުވުން ފާޅުކޮށްފައެވެ.

އެހެންކަމުން ބިންކޮނުމުގެ އެކި މަސައްކަތްތައް ކުރާ ފަރާތްތަކުން އިތުރަށް ސަމާލުވެ، ރައްކާތެރިކަމުގެ ފިޔަވަޅުތައް އެޅުމަށް އެ އިދާރާއިން ވަނީ އިލްތިމާސްކޮށްފައެވެ.