ރަސްމާލޭގައި އަބޫދާބީގެ މަޝްހޫރު ޑިވެލޮޕަރު، އީގަލް ހިލްސްއާ ހަވާލުކޮށްގެން ކުރިއަށްގެންދިޔުމަށް ހަމަޖެހިފައިވާ 20 ބިލިއަން ޑޮލަރު (ގާތްގަނޑަކަށް 308 ބިލިއަން ރުފިޔާ) ގެ ވޯޓާފްރަންޓް އަދި މެރީނާ މަޝްރޫޢު ކުރިއަށް ގެންދިޔަ ނުދިމަށް އިދިކޮޅު ފަރާތްތަކުން ކުރަމުންދާ މަސައްކަތްތަކަށް ރައްޔިތުން ނޫނެކޭ ބުނަންޖެހޭ ކަމަށް ފުވައްމުލަކު ދެކުނު ދާއިރާގެ މެންބަރު އިބްރާހީމް ހުސެއިން (ޑްރީމްސް އިއްބެ) ވިދާޅުވެއްޖެއެވެ.

ސަންގު ޓީވީގެ ޕްރޮގްރާމެއްގައި ވާހަކަދައްކަވަމުން މެންބަރު އިއްބެ ވިދާޅުވީ، މިފަދަ ބޮޑު ނިއުމަތެއް ލިބުމުން އެކަމާ އުފާކޮށް، މި މަޝްރޫޢު ގެނައުމަށް ކޮންމެ ދިވެހި ރައްޔިތަކުވެސް ކުރެވެން ހުރި ހުރިހާ މަސައްކަތެއް ކުރަންޖެހޭ ކަމަށެވެ. އަދި މިފަދަ މަޝްރޫޢުތަކުގެ ސަބަބުން ގައުމަށާއި ރައްޔިތުންނަށް ލިބިގެންދާނެ މަންފާ ބޮޑުކަން ފާހަގަކުރައްވައި، މީގެ ކުރިން ރާއްޖޭގައި ހުޅުވިފައިވާ ބޮޑެތި އިންވެސްޓްމަންޓްތަކުގެ މިސާލުތައް އޭނާ ދެއްކެވިއެވެ.

"ރައްޔިތުންނަށް މިފަދަ ނިއުމަތެއް ލިބުނީމާ އަޅުގަނޑުމެން އެކަމާ އުފާކުރަންވީ. މި ޕޮރެޖެކްޓް ގެނައުމަށް ކުރަންޖެހޭ ކޮންމެ މަސައްކަތެއް ކޮންމެ ދިވެހި ރައްޔިތަކު ކުރަންވީ،" މެންބަރު ވިދާޅުވިއެވެ.

އިދިކޮޅު ފަރާތްތަކުން މި މަޝްރޫޢާ ގުޅޭގޮތުން ދައްކަމުންދާ ވާހަކަތަކަށް ރައްދުދެއްވަމުން އިއްބެ ސިފަކުރެއްވީ އެއީ ހަގީގަތުގައިވެސް ރައްޔިތުންނަށް "ނޫނެކޭ" ބުނުން ކަމަށެވެ. އެ ފަރާތްތަކުން ދައްކާ ވާހަކަތަކުގައި އެއްވެސް ހުއްޖަތެއް ނެތް ކަމަށާއި، މިއީ ކަނޑައެޅިގެން ރައްޔިތުންނަށް އޮޅުވާލައި ޣައްދާރުވުން ކަމަށްވެސް އޭނާ ވިދާޅުވިއެވެ.

މި ޕްރޮޖެކްޓަކީ ރާއްޖޭގެ އިގްތިސާދަށް އެކި ގޮތްގޮތުން ބޮޑެތި ކުރިއެރުންތަކާއި ފަހި ފުރުސަތުތަކެއް ހޯދައިދޭނެ، ގައުމުގެ ކުޑަބޮޑު އެންމެންނަށް މަންފާކުރާނެ މުހިންމު މަޝްރޫޢެއްކަން ފާހަގަކުރައްވަމުން، މި މަޝްރޫޢު ހުއްޓުވުމަށް މަސައްކަތް ނުކޮށް އެންމެން އެކުގައި މިކަމަށް ތާއީދުކޮށް ގެނައުމަށް މަސައްކަތް ކުރުމަށް މެންބަރު އިބްރާހީމް ހުސެއިން ގޮވާލެއްވިއެވެ.