މަގުމަތީގެ ސަލާމަތާއި ރައްކާތެރިކަން ކަށަވަރުކުރުމަށްޓަކައި، ޓްރެފިކް ގަވާއިދުތަކާ ތަކުރާރުކޮށް ހިލާފުވާ ފަރާތްތަކާމެދު ހާއްސަ އަދި ހަރުކަށި ފިޔަވަޅުތަކެއް އަޅުއްވާނެ ކަމަށް ކޮމިޝަނަރ އޮފް ޕޮލިސް އަޙްމަދު މުޙައްމަދު ވިދާޅުވެއްޖެއެވެ.

ކޮމިޝަނަރ އޮފް ޕޮލިސް ދެއްވި މެސެޖެއްގައި ވިދާޅުވީ، މަގުމަތީގެ އާންމު އުސޫލުތަކާއި އަދަބުތަކަށް ބޯނުލަނބާ މަދު ބައެއްގެ ސަބަބުން ގިނަ ބައެއްގެ ހައްގުތައް ގެއްލި، ނުރައްކާތެރި އެކިއެކި ހާދިސާތައް ތަކުރާރުކޮށް ހިނގަމުންދާ ކަމަށެވެ. އެހެންކަމުން، މިފަދަ އުސޫލުތަކާއި ޓްރެފިކް ގާނޫނާއި ގަވާއިދުތަކާ ތަކުރާރުކޮށް ހިލާފުވާ ފަރާތްތަކާމެދު ފުލުހުންގެ ފަރާތުން ހާއްސަ ފިޔަވަޅުތަކެއް އަޅަމުން ގެންދާނެ ކަމަށް އޭނާ ވިދާޅުވިއެވެ. ނަމަވެސް، އަޅާނެ ސީދާ ފިޔަވަޅުތަކުގެ ތަފްސީލެއް އެ މެސެޖުގައި ދެއްވާފައެއް ނުވެއެވެ.

ސީޕީ ވިދާޅުވިގޮތުގައި، މި ފިޔަވަޅުތަކުގެ މައިގަނޑު މަގުސަދަކީ މަގުތަކަކީ އެންމެހާ ރައްޔިތުންނަށްވެސް ރައްކާތެރި އަދި އަމާން ތަނެއްގެ ގޮތުގައި ބޭއްވުމާއި، މަދު ބައެއްގެ އިހުމާލުން ހިނގާ މިފަދަ ނުރައްކާތެރި ހާދިސާތައް ހުއްޓުވުމެވެ. އަދި މި ފިޔަވަޅުތައް ކަމާގުޅުންހުރި އެންމެހާ މުއައްސަސާތަކާ ގުޅިގެން އެންމެ މަތީ ދަރަޖައެއްގައި ތަންފީޒުކުރުމަށް ފުލުހުންގެ ކަމާބެހޭ ބަހާތަކަށް ސީޕީ ވަނީ އަންގަވާފައެވެ.

މި ފިޔަވަޅުތައް ގްރޭޓަރ މާލެ ސަރަހައްދުގެ އިތުރުން އަތޮޅުތަކުގެ ރަށްރަށުގައިވެސް ތަންފީޒުކުރަމުން ގެންދާނެ ކަމަށް ސީޕީ ހާމަކުރެއްވިއެވެ. އަދި މަގުމަތީގެ ރައްކާތެރިކަން ދެމެހެއްޓުމަށްޓަކައި އެންމެހާ ރައްޔިތުންގެ ފަރާތުން ފުލުހުންނަށް ފުރިހަމަ އެހީތެރިކަމާއި އެއްބާރުލުން ދެއްވުމަށް ސީޕީ ވަނީ އިލްތިމާސްކުރައްވާފައެވެ.