މެލޭޝިޔާގެ ކުރީގެ ބޮޑުވަޒީރު ތުން ޑރ. މަހާތީރު މުޙައްމަދު، އެމަނިކުފާނުގެ އަނބިކަނބަލުން އަވަހާރަވުމާ ގުޅިގެން، ހޮސްޕިޓަލުގައި އެޑްމިޓްކޮށްގެން ފަރުވާދޭން ފަށައިފިއެވެ.

މެލޭޝިޔާގެ ދައުލަތުގެ މީޑިއާއިން ރިޕޯޓްކޮށްފައިވާ ގޮތުގައި، އުމުރުފުޅުން 101 އަހަރުގެ މަހާތީރު ހޮސްޕިޓަލުގައި އެޑްމިޓްކުރެއްވީ އެމަނިކުފާނުގެ އަނބިކަނބަލުން ސިތީ ހަސްމާ މުޙައްމަދު ޢަލީ އަވަހާރަވިތާ ޖެހިގެން އައި ދުވަހުއެވެ.

މަހާތީރުގެ ދަރިކަލުން މުޚްރިޒް މަހާތީރާ ހަވާލާދީ މެލޭޝިޔާގެ ބާނާމާ ނިއުސް އޭޖެންސީން ރިޕޯޓްކޮށްފައިވާ ގޮތުގައި، މަހާތީރު އެޑްމިޓްކުރައްވާފައިވަނީ މެލޭޝިޔާގެ ނެޝަނަލް ހާޓް އިންސްޓިޓިއުޓް (އައިޖޭއެން) ގައެވެ.

އެމަނިކުފާނު އަންގާރަ ދުވަހު ހޮސްޕިޓަލުގައި އެޑްމިޓްކުރެއްވީ ޑޮކްޓަރުންގެ ހާއްސަ ބެލުމުގެ ދަށުން ސިއްހީ ހާލުކޮޅު މޮނިޓަރުކުރުމުގެ ގޮތުންނެވެ.

އުމުރުފުޅުން 100 އަހަރުގައި ސިތީ ހަސްމާ އަވަހާރަވީ ހާޓް އެޓޭކެއް ޖެހިވަޑައިގެން ހާލުކޮޅު ދެރަވުމާ ގުޅިގެން އައިޖޭއެން ހޮސްޕިޓަލުގައި ފަރުވާދެމުން ދަނިކޮށް ހޯމަ ދުވަހުއެވެ. އަދި އެކަމަނާގެ ޖަނާޒާގެ ކަންކަން ވަނީ އެ ދުވަހުގެ ނިޔަލަށް ކުރިއަށް ގޮސްފައެވެ.

މަހާތީރު މުޙައްމަދާއި ސިތީ ހަސްމާއަކީ ސިއްހީ ދާއިރާއިން އުނގެނިވަޑައިގެން ތިއްބެވި ދެ ޑޮކްޓަރުންނެވެ. 70 އަހަރު ވަންދެން ކައިވެނިބައްލަވައިގެން އުޅުއްވި މި ދެބޭފުޅުންގެ 7 ބޭފުޅުން ތިއްބަވައެވެ.