މޯލްޑިވްސް ޙައްޖު ކޯޕަރޭޝަންގެ ރިއަލް އެސްޓޭޓް މަޝްރޫއެއް ކަމަށްވާ 'ނިއާމް ރެސިޑެންސް' ގެ އެޕާޓްމަންޓުތައް މުވައްޒަފުންނަށް ވިއްކުމުގެ ގޮތުން މިހާތަނަށް ކޮށްފައިވާ އެންމެހާ މުޢާމަލާތްތައް ކެންސަލް ކުރުމަށް އެ ކޯޕަރޭޝަނުން ނިންމައިފިއެވެ.

ޙައްޖު ކޯޕަރޭޝަނުން ނެރުނު ނޫސްބަޔާނެއްގައި ބުނެފައިވަނީ އެ ކުންފުނީގެ މާލީ ޙާލަތު ރަނގަޅުކޮށް، ފައިދާ އިތުރުކުރުމަށް ކުރަމުންދާ މަސައްކަތްތަކުގެ ދަށުން ލަގްޒަރީ ހައުސިން މަޝްރޫއެއްގެ ގޮތުގައި "ނިއާމް ރެސިޑެންސް" އަންނަނީ ތަރައްޤީކުރަމުންކަމަށެވެ. މި ޕޮރެޖެކްޓުގެ ކޮންމެ އެޕާޓްމަންޓަކުންވެސް ކުންފުންޏަށް އެންމެ ބޮޑު މާލީ ފައިދާއެއް ލިބޭނެ އުސޫލަކުން އަގުތައް ކަނޑައެޅުމުގެ މަސައްކަތް މިހާރު ކުރަމުންދާކަމަށް ހައްޖު ކޯޕަރޭޝަނުން ބުންޏެވެ.

އަގުތައް ކަނޑައެޅުމަށްފަހު، ޢާންމުކޮށް ހުޅުވާލައިގެން ޔުނިޓުތައް ވިއްކުމުގެ ކަންކަން ކުރިއަށް ގެންދިއުމަށް ވަނީ ނިންމާފައެވެ. އެހެންކަމުން، މި މަސައްކަތްތަކުގެ ކުރިން މުވައްޒަފުންނަށް އެޕާޓްމަންޓުތައް ދޫކުރުމަށް މިހާތަނަށް ހިންގާފައިވާ ހުރިހާ މުޢާމަލާތެއް ބާޠިލުކޮށްފައިވާ ކަމަށް އެ ކޯޕަރޭޝަނުން ބުނެފައިވެއެވެ.

މި މަޝްރޫޢުގެ ފުރަތަމަ މަރުހަލާ ފަހި ދިރިއުޅުން ކޯޕަރޭޝަން (އެފްޑީސީ) އާ ޙަވާލުކޮށްފައިވަނީ 2024 ވަނަ އަހަރުގެ ސެޕްޓެމްބަރު މަހުއެވެ. އެ އެއްބަސްވުމުގައި އެފްޑީސީގެ ފަރާތުން ސޮއިކުރެއްވީ އެ ކޯޕަރޭޝަންގެ މެނޭޖިން ޑިރެކްޓަރ ޙަމްދާން ޝަކީލެވެ. އަދި ޙައްޖު ކޯޕަރޭޝަންގެ ފަރާތުން ސޮއިކުރެއްވީ އެ ކޯޕަރޭޝަންގެ އޭރުގެ މެނޭޖިން ޑިރެކްޓަރ މުޙައްމަދު ޝަކީލެވެ. މި އެއްބަސްވުމުގެ ދަށުން އެޕާޓްމަންޓް އިމާރާތުގެ ކުރެހުންތައް ތައްޔާރުކުރުމާއި، އާކިޓެކްޗަރަލް، އިންޖިނިއަރިން އަދި ކޮންސަލްޓެންސީގެ ޚިދުމަތްތައް ފޯރުކޮށްދެނީ އެފްޑީސީންނެވެ.

މި މުޢާމަލާތްތައް ބާތިލުކޮށްފައިމިވަނީ، ކުރީގެ ވެރިންތަކަކަށް މި ރެސިޑެންސް އިން އެޕާޓްމަންޓްތަކެއް ދޫކޮށްފައިވާ ކަމަށް ބުނެ ބައެއް މީޑިއާތަކުގައި ޚަބަރު ފެތުރިފައިވަނިކޮށެވެ.