ރަސްމާލެ މަޝްރޫއުން 10 އަހަރު ތެރޭ ދައުލަތަށް 11 ބިލިއަން ޑޮލަރުގެ އާމްދަނީއެއް ލިބޭނެ ކަމަށް ފިނޭންސް މިނިސްޓަރު ހަސަން ޒަރީރު އަންދާޒާ ކުރައްވައިފިއެވެ.

އަބޫދާބީގެ މަޝްހޫރު ޑިވެލޮޕަރު، އީގަލް ހިލްސް އާއި ދިވެހި ސަރުކާރާ ދެމެދު ރާއްޖޭގައި 20 ބިލިއަން ޑޮލަރު ނުވަތަ ގާތްގަނޑަކަށް 308 ބިލިއަން ރުފިޔާގެ ވޯޓާފްރަންޓް އަދި މެރީނާ މަޝްރޫއެއް ތަރައްގީކުރުމަށް އެއްބަސްވުމެއްގައި ދާދިފަހުން ވަނީ ސޮއިކޮށްފައެެވެ.

މި މަޝްރޫއާ ގުޅޭގޮތުން ސޯޝަލް މީޑިއާގައި ހިއްސާކުރެއްވި ޕޯސްޓެއްގައި ފިނޭންސް މިނިސްޓަރު ޒަރީރު ވިދާޅުވީ ރަސްމާލޭގައި ތަރައްގީކުރާ މޯލްޑިވްސް ވޯޓާފްރަންޓް އެންޑް މެރީނާ މަޝްރޫއުގެ 10 އަހަރުގެ ތަރައްގީގެ މުއްދަތުގެ ތެރޭގައި ދައުލަތަށް އާމްދަނީގެ ގޮތުގައި 11 ބިލިއަން އެމެރިކާ ޑޮލަރަށްވުރެ ގިނަ އަދަދެއް ލިބޭނެ ކަމަށް ލަފާކުރެވޭ ކަމަށެވެ. އަދި މިއީ އަހަރަކު އެވްރެޖުކޮށް ގާތްގަނޑަކަށް 1.1 ބިލިއަން އެމެރިކާ ޑޮލަރު ކަމަށް ވަޒީރު ފާހަގަކުރެއްވިއެވެ.

މީގެ އިތުރުން މިނިސްޓަރު ވިދާޅުވީ އަހަރަކު ލިބޭނެ ކަމަށް ލަފާކުރާ މި އާމްދަނީއަކީ 179 ރިޒޯޓާއި، 16 ހޮޓަލާއި، 920 ގެސްޓްހައުސްގެ އިތުރުން 165 ސަފާރީ އުޅަންދުން ދައުލަތަށް އަހަރަކު ލިބޭ މުޅި އާމްދަނީއަށްވުރެ އިތުރު އަދަދެއް ކަމަށެވެ. އަދި މިއިން ރަމްޒުކޮށްދެނީ ދައުލަތުގެ މާލިއްޔާތު ވަރުގަދަކުރުމަށާއި ރާއްޖޭގެ ދުރުރާސްތާ ތަރައްގީއަށް އެހީތެރިވުމުގައި މި މަޝްރޫއުގެ ގާބިލުކަން ކަމަށް ވަޒީރު ވިދާޅުވިއެވެ.

The Maldives Waterfront and Marina project at Ras Malé is projected to generate over US$11 billion in State revenue during its 10-year development period, an average of approximately US$1.1 billion annually.

This projected annual contribution would exceed the annual government… pic.twitter.com/e58wGbTguJ

— Hassan Zareer (@Finance_Min_MV) September 30, 2026

މިނިސްޓަރު ވިދާޅުވީ ރަސްމާލެ އެއްބަސްވުމުގެ ދަށުން ދައުލަތަށް އާމްދަނީ ލިބެން ކަނޑައެޅިފައި ވަނީ އާންމު އުސޫލުން ނެގޭ ޓީޖީއެސްޓީގެ އިތުރުން، މާސްޓާ ޑިވެލޮޕަރުގެ ފުރަތަމަ ވިއްކުންތަކާއި ކުއްޔަށްދިނުންތަކުން ލިބޭ އާމްދަނީގެ 10 އިންސައްތައިން ކަމަށެވެ. އަދި ފުރަތަމަ ގަންނަ ފަރާތްތަކުންނާއި އޭގެފަހުން އެހެން ފަރާތްތަކަށް މިލްކުވެރިކަން ބަދަލުކުރާއިރު މުދަލުގެ އަގުގެ ހަތަރު އިންސައްތައިގެ ފީއެއްގެ ގޮތުގައި ވެސް ދައުލަތަށް ނަގާނެ ކަމަށް މިނިސްޓަރު ވިދާޅުވިއެވެ.

މި އެއްބަސްވުމުގެ ދަށުން އެއްވެސް ޓެކްސް އިނާޔަތެއް ނުވަތަ ޑިއުޓީ އިސްތިސްނާއެއް ދީފައެއް ނުވާނެ ކަމަށާއި އަދި މި ތަރައްގީގެ މަޝްރޫއަށް ސަރުކާރުން އެއްވެސް ލޯނެއް ނުނަގާނެ ކަމަށް ޒަރީރު ފާހަަގަކުރެއްވިއެވެ. އެހެންކަމުން ދައުލަތަށް މާލީ އިލްތިޒާމްތަކެއް އުފެދުމެއް ނެތި، ދައުލަތުގެ އާމްދަނީއަށް މި މަޝްރޫއުން ފައިދާ ކުރާނެކަން ކަށަވަރުވާ ކަމަށް ޒަރީރު ވިދާޅުވިއެވެ. ރަސްމާލެ އެއްބަސްވުމުގެ ދަށުން، މުދާ ވިއްކައިގެން ލިބޭ އެންމެހައި ފައިސާއެއް ބަހައްޓާނީ ރާއްޖޭގައި ގާއިމުކުރެވޭ އެސްކްރޯ އެކައުންޓެއްގައި ކަން ފާހަގަކުރައްވައި ޒަރީރު ވިދާޅުވީ އެ ފައިސާ ދޫކުރުން ބިނާވެގެންވަނީ އެއްބަސްވުމުގައިވާ ގޮތުގެ މަތިން ކަމަށާއި މީގެ އިތުރުން މަޝްރޫއުގެ އެންމެހައި ފައިސާގެ މުއާމަލާތްތައް ހިންގަންޖެހޭނީ ދިވެހިރާއްޖޭގެ ބޭންކުތައް މެދުވެރިކޮށް ކަމަށެވެ.

"ރަސްމާލެ އެއްބަސްވުމުގައި ރޭވިފައިވަނީ 500 ހެކްޓަރުގެ ބިމެއްގައި، ގާތްގަނޑަކަށް 10 އަހަރު ދުވަހުގެ މުއްދަތަކަށް ބަހާލައިގެން، 20 ބިލިއަން އެމެރިކާ ޑޮލަރުގެ ވޯޓާފްރަންޓް އަދި މެރީނާ މަޝްރޫއެއް ތަރައްގީކުރުމަށް. މީގެ ތެރޭގައި ގޭގެއާއި، ހޮޓާތަކާއި، ރިޒޯޓުތަކާއި، މެރީނާއާއި، ފިހާރަތަކާއި، އޮފީސްތަކުގެ އިތުރުން ތައުލީމީ އަދި ސިއްހީ ޚިދުމަތްދޭ ވަސީލަތްތައް ހިމެނޭނެ،" މިނިސްޓަރު ވިދާޅުވިއެވެ.

މީގެ އިތުރުން މިނިސްޓަރު ވިދާޅުވީ ގާތްގަނޑަކަށް 10 އަހަރުގެ ތެރޭގައި މަޝްރޫއު މުޅިން ފުރިހަމަވުމުން، އަހަރަކު އެއް މިލިއަނަށްވުރެ ގިނަ ފަތުރުވެރިން ޒިޔާރަތްކުރާނެ ކަމަށް ލަފާކުރެވޭ ކަމަށެވެ.އަދި އިގްތިސާދަށް ފަތުރުވެރިކަމުގެ އާމްދަނީގެ ގޮތުގައި އަހަރަކު ގާތްގަނޑަކަށް ދެ ބިލިއަން އެމެރިކާ ޑޮލަރު ވަންނާނެ ކަމަށް ބެލެވޭ ކަމަށް ވަޒީރު ވިދާޅުވިއެވެ.މިނިސްޓަރު ޒަރީރު ވިދާޅުވީ މިއީ ރާއްޖޭގެ ފަތުރުވެރިކަމުގެ ދާއިރާ ވަރުގަދަވެ، ދުރުރާސްތާގެ އިގްތިސާދީ ކުރިއެރުމަށް ބޮޑު ބާރަކަށް ވެގެންދާނެ ކަމެއް ކަމަށެވެ.

މި މަޝްރޫޢާ ގުޅޭގޮތުން ރައީސް މުޢިއްޒު ވިދާޅުވެފައިވަނީ ރާއްޖޭގެ ތާރީޚުގައި ހިންގާ އެންމެ ބޮޑު އިންވެސްޓްމަންޓާއެކު ޖީޑީޕީ މަތިވެ، ޤައުމީ އިޤްތިސާދަށާއި ރައްޔިތުންނަށް ބޮޑެތި ކުރިއެރުންތަކެއް ލިބިގެންދާނެ ކަމަށެވެ.