އެމެރިކާ އާއި އިސްރާއީލުގެ އެހީތެރިކަމާއެކު އީރާނުގައި ހަމަނުޖެހުން އުފައްދައި، އާންމު ތަންތަނަށް ގެއްލުންދޭން މަސައްކަތްކުރި ހަތަރު ނެޓްވޯކަކަށް ނިސްބަތްވާ 31 މީހަކު ހައްޔަރުކޮށްފިއެވެ.

އީރާނުގެ އިންޓެލިޖެންސް މިނިސްޓްރީން މަޢުލޫމާތު ދީފައިވާ ގޮތުގައި މި މީހުން ހައްޔަރުކޮށްފައިވަނީ އެ ގައުމުގެ ދެކުނުގައި އޮންނަ ކަރްމާން ޕްރޮވިންސްގެ ސިރްޖާން ކައުންޓީންނެވެ.

އިންޓެލިޖެންސް މިނިސްޓްރީން ހާމަކުރި ގޮތުގައި، ހައްޔަރުކުރެވުނު ގްރޫޕުން ވަނީ ފުރާވަރުގެ ކުދިންނާއި ޒުވާނުން މަގުމައްޗަށް ނެރެ، ހަމަނުޖެހުންތައް އުފެއްދުމަށް ރާވާފައެވެ.

އަދި ސިޓީތަކުގައި ހަރުކޮށްފައިވާ ސަވައިލަންސް ކެމެރާތަކަށް ދޭ ހަމަލާތަކުގައި ބޭނުންކުރުމަށްޓަކައި، ގިނަ އަދަދެއްގެ ޕެޓްރޯލް ބޮން ތައްޔާރުކޮށްފައިވާ ކަމަށްވެސް އެ މިނިސްޓްރީން ވަނީ ބުނެފައެވެ.

މީގެ އިތުރުން، މިދިޔަ ޖެނުއަރީ މަހުގެ ތެރޭގައި މުޅި އީރާނުގައި ކުރިއަށްދިޔަ މުޒާހަރާތަކުގައި ހިންގި ތަޅާފޮޅުންތަކާއި، ތަންތަނަށް ގެއްލުންދިނުމުގެ އަމަލުތަކުގެ ފަހަތުގައިވަނީވެސް މި ނެޓްވޯކްތައް ކަމަށް އީރާނުގެ އިންޓެލިޖެންސް މިނިސްޓްރީން ތުހުމަތުކުރެއެވެ.