ދެ ފައިގެ ފަލަމަސްގަނޑުގައި ޓޭޕް އަޅައިގެން ގިނަ އަދަދެއްގެ މަސްތުވާތަކެތި ހަނިމާދޫއަށް އެތެރެކުރަން އުޅުނު މީހަކު 50 އަހަރަށް ޖަލަށް ލުމަށާއި، 200،000 ރުފިޔާއިން ޖޫރިމަނާކުރުމަށް ކްރިމިނަލް ކޯޓުން ހުކުމްކޮށްފިއެވެ.

މި މައްސަލައިގައި ކޯޓުން ހުކުމްކޮށްފައިވަނީ ށ. ނޫމަރާ، ހަވީރީގެ، ޢަބްދުﷲ ފަޞީޙުގެ މައްޗަށެވެ.

މިއީ 7 އޮކްޓޫބަރު 2024 ގައި ވެލާނާ އިންޓަނޭޝަނަލް އެއާޕޯޓުން ފުރަން ގޮސް ހުއްޓާ ފަޞީޙު ހައްޔަރުކޮށް، އޭނާގެ ހަށިގަނޑު ބަލައިފާސްކުރިއިރު ފަލަމަސްގަނޑުގައި އޮޅާފައިވާ ޓޭޕްގެ ދަށުން ގިނަ އަދަދެއްގެ މަސްތުވާތަކެތި ފެނުނު މައްސަލައެކެވެ. އެގޮތުން ފަސީހުގެ އަތުން 23.5976 ގްރާމްގެ ޑައިމޯފިން އާއި 10 ފިލްމު ދަޅުގައި ބަންދުކޮށްފައި ހުރި 252.1652 ގްރާމްގެ ކެނެބިސް ފެނިފައިވެއެވެ.

މައްސަލައިގެ ޝަރީއަތުގެ މަރުޙަލާގައި ފަޞީޙު ބުނެފައިވަނީ، އޭނާއަކީ ހިއުމަން ޓްރެފިކިންގެ ވިކްޓިމެއް ކަމަށެވެ. ނަމަވެސް، އެކަން ސާބިތުކޮށްދިނުމަށް އެއްވެސް ހެއްކެއް ހުށަހެޅިފައި ނުވާތީއާއި، ތަހުގީގު މަރުޙަލާގައިވެސް އޭނާ ހަނުހުރުމުގެ ހައްގު ބޭނުންކޮށްފައިވާތީ، ކޯޓުން ވަނީ ދައުލަތުން ހުށަހެޅި ހެކިތަކަށް ރިއާޔަތްކޮށް އޭނާގެ މައްޗަށް ކުށް ސާބިތުވާ ކަމަށް ނިންމާފައެވެ.

މި މައްސަލާގައި ކްރިމިނަލް ކޯޓުން ކޮށްފައިވާ ހުކުމުގައި، ފަޞީޙުގެ މައްޗަށް ދައުލަތުން އުފުލި ދެ ދައުވާ ވެސް އެކަށީގެންވާ ޝައްކެއްނެތް މިންވަރަށް ސާބިތުވާ ކަމަށް ވަނީ ކަނޑައަޅާފައެވެ. އެގޮތުން ޑައިމޯފިން ޓްރެފިކް ކުރުމުގެ އަދަބެއްގެ ގޮތުން އުމުރަށް (25 އަހަރަށް) ޖަލަށް ލުމާއެކު 100,000 ރުފިޔާއިން ވަނީ ޖޫރިމަނާކޮށްފައެވެ. މި މައްސަލައިގައި ބަންދުގައި ހޭދަކުރި މުއްދަތު އުނިކުރުމުން، އޭނާ މި ދައުވާއާ ގުޅިގެން ތަންފީޒުކުރަން ޖެހޭނީ 24 އަހަރާއި 4 މަހާއި 3 ދުވަހުގެ ޖަލު އަދަބެކެވެ. އަދި ކެނެބިސް ޓްރެފިކް ކުރުމުގެ ކުށުގެ އަދަބެއްގެ ގޮތުން ވެސް އުމުރަށް (25 އަހަރަށް) ޖަލަށް ލުމާއެކު 100,000 ރުފިޔާއިން ވަނީ ޖޫރިމަނާ ކޮށްފައެވެ.

މި ދެ މައްސަލައިގެ ޖުމްލަ ޖޫރިމަނާ ކަމަށްވާ 200،000 (ދެލައްކަ) ރުފިޔާ، ހުކުމް ކުރި ތާރީޚުން ފެށިގެން 12 މަސްދުވަހުގެ ތެރޭގައި މޯލްޑިވްސް އިންލަންޑް ރެވެނިއު އޮތޯރިޓީ (މީރާ) އަށް ދައްކައި ޚަލާޞްކުރުމަށް ކޯޓުގެ ހުކުމުގައި ވަނީ އަންގާފައެވެ.