ފަތުރުވެރިކަމުގެ ދާއިރާއިން ނަގާ ޓީޖީއެސްޓީ (ޑެސްޓިނޭޝަން ޕްރިންސިޕަލް ޓީޖީއެސްޓީ) އޮނިގަނޑަށް ގެންނަން ނިންމާފައިވާ ބަދަލުތައް މުރާޖަޢާކުރުމަށް ސަރުކާރުން ނިންމެވި ނިންމެވުމަށް މޯލްޑިވްސް އެސޯސިއޭޝަން އޮފް ޓްރެވަލް އޭޖެންޓްސް އެންޑް ޓުއާ އޮޕަރޭޓާސް (މަޓާޓޯ) އިން މަރުޙަބާ ކިޔައިފިއެވެ.

މަޓާތޯ އިން މިހެން ބުނެފައިވަނީ، މި އުސޫލު ތަންފީޒުކުރުމާ ގުޅޭގޮތުން ފަތުރުވެރިކަމުގެ ދާއިރާގެ ހިއްސާދާރުންނާއި ޓްރެވަލް އެޖެންޓުން ފާޅުކުރި ކަންބޮޑުވުންތަކަށް ރިޢާޔަތްކުރެއްވުމަށްފަހު، މި އޮނިގަނޑަށް ބަދަލުތަކެއް ގެންނެވުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ނިންމަވާފައިވާ ކަމަށް ޓޫރިޒަމް މިނިސްޓަރު މުޙައްމަދު އަމީން ވިދާޅުވުމާ ގުޅީގެންނެވެ.

މިކަމާ ގުޅިގެން މަޓާޓޯއިން ވަނީ، ފަތުރުވެރިކަމުގެ ސިނާޢަތުގެ ކަންބޮޑުވުންތައް އަޑުއައްސަވައި، އެކަމަށް އިޖާބަދެއްވުމަށް ސަރުކާރުން ނެންގެވި އިސްނެންގެވުމަށް ޝުކުރު އަދާކޮށްފައެވެ. މަޓާޓޯއިން ބުނީ، ފާއިތުވި ހަފުތާތަކުގައި މަޓާޓޯއިން ވަނީ މި ބަދަލުތަކުގެ ސަބަބުން ވިޔަފާރިތަކަށާއި އޮޕަރޭޝަންތަކަށް ކުރާނެ އަސަރުތައް ދެނެގަތުމަށްޓަކައި ސިނާޢަތުގެ ފެންވަރުގައި ސާވޭއެއް ކޮށް، ރާއްޖެއާއި ރާއްޖެއިން ބޭރުގެ ހިއްސާދާރުންނާއެކު މަޝްވަރާތައް ބާއްވާފައި ކަމަށެވެ.

މަޓާޓޯގެ ސެކްރެޓަރީ ޖެނެރަލް ސުޢޫދު ވިދާޅުވީ، މިއީ ވަރަށް ރަނގަޅު އަދި މުހިންމު ފިޔަވަޅެއް ކަމަށެވެ. އަދި ފަތުރުވެރިކަމުގެ ސިނާޢަތް އަބަދުވެސް ކުރިއަރައިގެން ގޮސްފައިވަނީ ސަރުކާރާއި މި ސިނާޢަތް ގުޅިގެން، މަޝްވަރާގެ އުސޫލުން މަސައްކަތް ކުރުމުން ކަމަށް އޭނާ ފާހަގަ ކުރެއްވިއެވެ.

މީގެއިތުރުން ދައުލަތަށް ލިބޭ އާމްދަނީ ރައްކާތެރި ކުރެވޭނެ، އަދި ހަމައެއާއެކު ބައިނަލްއަޤްވާމީ ބާޒާރުގައި ރާއްޖެއަކީ ވާދަވެރި އަދި ވިއްކަން ފަސޭހަ މަންޒިލެއްގެ ގޮތުގައި ދެމިއޮންނާނެ ފަދަ ހަމަހަމަ އޮނިގަނޑެއް އެކުލަވާލުމުގައި ސަރުކާރަށް އެއްބާރުލުން ދިނުމަށް މަޓާޓޯ އަބަދުވެސް ތައްޔާރަށް އޮތް ކަމަށް ސުޢޫދު ވިދާޅުވިއެވެ.

މި އިޞްލާޙުތައް އެކުލަވާލުމުގެ މަސައްކަތް ކުރިއަށްދާއިރު، ސަރުކާރާއި، މޯލްޑިވްސް އިންލަންޑް ރެވެނިއު އޮތޯރިޓީ (މީރާ)، ރާއްޖޭގެ ފަތުރުވެރިކަމުގެ ދާއިރާގެ ފަރާތްތަކާއި ބައިނަލްއަޤްވާމީ ޓްރެވަލް ޕާޓްނަރުންނާއެކު އިތުރު މަޝްވަރާތައް ކުރުމަށް މަޓާޓޯއިން އުންމީދުކުރާ ކަމަށް އެ ޖަމްޢިއްޔާއިން ވަނީ ބުނެފައެވެ.