ދިވެހި ފުލުހުންގެ ޚިދުމަތުގެ ރަސްމީ ތަރުޖަމާނުގެ މަގާމަށް އިންސްޕެކްޓަރ އޮފް ޕޮލިސް އަޙްމަދު ޝިޔާމް ހަމަޖައްސައި، އެކަން ފުލުހުންގެ އިދާރާއިން މިއަދު ރަސްމީކޮށް އިއުލާނުކޮށްފިއެވެ.

ފުލުހުން ހާމަކުރި ގޮތުގައި، ޝިޔާމް މި މަގާމާ ހަވާލުވެވަޑައިގަތީ މީގެކުރިން އެ މަސްއޫލިއްޔަތު އަދާކުރައްވަމުން ގެންދެވި ސުޕްރިންޓެންޑެންޓް އޮފް ޕޮލިސް އާރިފްގެ ބަދަލުގައެވެ. މި ގެނެވުނު ބަދަލާ ގުޅިގެން، ދިވެހި ފުލުހުންގެ ޚިދުމަތުގެ ފަރާތުން މީޑިއާތަކަށް މައުލޫމާތު ހާމަކުރުމާއި، މުޖުތަމައުގައި އާންމު ހޭލުންތެރިކަން އިތުރުކުރުމުގެ މުއާމަލާތްތަކުގައި އެންމެ އިސްކޮށް ދެން ހަރަކާތްތެރިވެވަޑައިގަންނަވާނީ ޝިޔާމްއެވެ.

އިންސްޕެކްޓަރ އޮފް ޕޮލިސް އަޙްމަދު ޝިޔާމަކީ މީގެކުރިން ވެސް ފުލުހުންގެ ތަރުޖަމާނުގެ މަގާމު ފުރުއްވައި، ނޫސްވެރިންނާއި މީޑިއާތަކާ ވަރަށް ގާތުން މަސައްކަތް ކުރައްވާފައިވާ ތަޖުރިބާކާރު ބޭފުޅެކެވެ.

މީޑިއާ ރިލޭޝަންސްގެ ދާއިރާއިން ފާހަގަކޮށްލެވޭ ޝިޔާމް، 12 އަހަރު ދުވަހުގެ މެދުކެނޑުމަކަށް ފަހު އަލުން ފުލުހުންގެ ވަޒީފާއަށް ނުކުމެވަޑައިގެންނެވީ 3 ޖޫން 2024 ގައެވެ.