މި ދައުރު ނިމުމުގެ ކުރިން މީހުން އުޅޭ ހުރިހާ ރަށެއްގައި ފެނާއި ނަރުދަމާ ޤާއިމްކުރުމާ ގުޅޭ ސްޓްރެޓެޖިކް ޕްލޭން މިއަދު ތައާރަފުކޮށްފި އެވެ.

"ފެނާއި ނަރުދަމާގެ ގާނޫނު" ބުނާގޮތުން، އެ ގާނޫނަށް އަމަލުކުރާ ތާރީހުން ފެށިގެން ފަސް އަހަރުގެ ތެރޭގައި މީހުން ދިރިއުޅޭ ހުރިހާ ރަށެއްގައި ބޯފެނާއި ނަރުދަމާގެ ނިޒާމް ގާއިމްކުރަން ޖެހެއެވެ. އަދި އެކަމަށް ކަނޑައަޅަންޖެހޭ ފަސް އަހަރުގެ ސްޓްރެޓީޖިކް ޕްލޭން ތިން މަސް ތެރޭގައި އެކުލަވާލަން ޖެހެއެވެ.

މިނިސްޓްރީ އޮފް އެންވަޔަރަންމަންޓްގައި މިއަދު ބޭއްވި ރަސްމިއްޔާތުގައި މި ޕްލޭން ތަޢާރަފްކޮށްދެއްވީ ތިމާވެއްޓާބެހޭ ވަޒީރު ޑރ. ޙުސައިން ރަޝީދު ޙަސަން އެވެ. ތިމާވެއްޓާ ބެހޭ ވުޒާރާއިން ބުނީ މި ޕްލޭން ތައްޔާރުކުރުމުގެ މަޤްސަދަކީ ފެނާއި ނަރުދަމާގެ ސިޔާސަތުތަކާ އެއްގޮތްވާގޮތުގެ މަތިން، މިދާއިރާ ތަރައްޤީކޮށް ކުރިއަރުވައި އަދި ޚިދުމަތުގެ ފެންވަރު ރަނގަޅު ކުރުން ކަމަށާއި، މިއީ 5 އަހަރުގެ މުއްދަތަށް ތައްޔާރުކޮށްފައިވާ ޕްލޭނެއް ކަމަށެވެ.

ޤާނޫނު ނަންބަރު 8/2020 (ފެނާއި ނަރުދަމާގެ ޤާނޫނު) ގެ ދަށުން ތައްޔާރުކުރަންޖެހޭ ފެނާއި ނަރުދަމާގެ ޤައުމީ ސްޓްރެޓީޖިކް ޕްލޭން މިއަދު އިފްތިތާޙްކޮށްފި. pic.twitter.com/GUDjhvHSuY

— Ministry of Environment (@MoEnvmv) November 4, 2020

މިއަދުގެ ރަސްމިއްޔާތުގައި މިނިސްޓަރ ޙުސައިން ރަޝީދު ވިދާޅުވީ، މިހާތަނަށް 42 ރަށުގައި ފެނުގެ ނިޒާމް ގާއިމްކޮށްފައިވާއިރު 69 ރަށުގައި ނަރުދަމާގެ ނިޒާމް ގާއިމްކޮށްފައިވާ ކަމަށެވެ. އަދި މިހާރު ވެސް 53 ރަށެއްގައި ނަރުދަމާ ނިޒާމް ގާއިމްކުރުމުގެ މަސައްކަތް ކުރަމުން އަންނަ ކަމަށް އޭނާ ވިދާޅުވި އެވެ.

މިދައުރު ނިމުމުގެ ކުރިން ރާއްޖޭގެ މީހުން ދިރިއުޅޭ ހުރިހާ ރަށެއްގައި ފެނާއި ނަރުދަމާގެ ނިޒާމް ޤާއިމްކުރުމަކީ ރައީސް އިބްރާހީމްގެ އިންތިޚާބީ ވަޢުދެކެވެ.