ފަރަންސޭސި ވިލާތުން ދެކޮޅީ މުށްލިމުންނާ ނޫންކަމަށާއި، އެގައުމުން ދެކޮޅީ ހަމަ އެކަނި ހައްދުފަހަނައަޅާފައިވާ މުސްލިމުންނާ ކަމަށް ފްރާންސްގެ ރައީސް އިމްނުއެލް މެކްރޮން ވިދާޅުވެއްޖެއެވެ.

ފްރާންސްގެ ރައީސް އިމްނުއެލް މެކްރޮން މިހެން ވިދާޅުވެފައިވަނީ ފައިނޭންޝިއަލް ޓައިމްސް ނޫހުގައި ޝާއިޢުކޮށްފައިވާ ލިޔުމަކާއި ގުޅިގެން އެނޫހަށް ފޮނުއްވި ސިޓީއެއްގައެވެ. މެކްރޮން މިހެން ވިދާޅުވުމާއި ގުޅިގެން ފައިނޭންޝިއަލް ޓައިމްސް ނޫހުގައި ޖަހާފައިވާ ލިޔުންވަނީ ނަގާފައެވެ.

މިދިޔަ ބުދަ ދުވަހު، ފައިނޭންޝިއަލް ޓައިމްސް ނޫހަށް މެކްރޮން ފޮނުއްވާފައިވާ ސިޓީގައި، ފްރާންސްގެ މުސްލިމުން އެކަހެރިކޮށް ބިރުދައްކަމުންދާކަމަށް ބުނެ މެކްރޮންއަށް ތުހުމަތުތަކެއްކޮށްފައިވާކަމަށް ވިދާޅުވެފައިވެއެވެ. މެކްރޮންގެ ސިޓީގައި، މިތުހުމަތުތައް ދޮގުކުރައްވާފައިވެސް ވެއެވެ.

"ފްރާންސްގެ ރައްޔިތުންނާ ސަރުކާރަކީ މުސްލިމުންނާ ދެކޮޅު ބައެއްކަން އެއްވެސް ބަޔަކަށް ނުބުނެވޭނެ." ފައިނޭންޝިއަލް ޓައިމްސް ނޫހުން ތުހުމަތުކޮށްފައިވާކަންކަން ދޮގުކުރައްވާ މެކްރޮން ވިދާޅުވެފައިވެއެވެ.

ފައިނޭންޝިއަލް ޓައިމްސް ނޫހުން ފްރާންސްގައި މުސްލިމުން އެކަހެރިކޮށް ބިރުދައްކާކަމަށް ބުނެ ލިޔެފައިވާ ލިޔުން އާންމުކޮށްފައިވަނީ މިދިޔަ އަންގާރަދުވަހުއެވެ. ފްރާންސްގެ ރައީސްގެ ސިޓީ އާއެކު އެލިޔުންވަނީ ނޫހުން ނަގާފައެވެ.