މިއީ އެމެރިކާގެ ނާއިބު ރައީސަކަށް އަންހެނަކު ހޮވުނު ފުރަަތަމަ ފަހަރުވިޔަސް މިއީ އަންހެނަކު އެމެރިކާގެ ނާއިބް ރައީސްކަމަށް އަންނަ ފަހު ފަހަރަކަށް ނުވާނެކަމުގައި އެމެރިކާގެ ނާއިބް ރައީސް ކަމަށް އިންތިޚާބުވެ ވަޑައިގެންނެވި ކަމަލާ ހެރިސް ވިދާޅުވެއްޖެއެވެ. ހެރިސް މިހެން ވިދާޅުވީ އެމެރިކާގެ ރިޔާސީ އިންތިހާބުގެ ކާމިޔާބީ އަށްފަހު، އެމެރިކާގެ ފުރަތަމަ އަންހެން ނާއިބު ރައީސަކަށް ވެވަޑައިގެންނެވުމުގެ އުފާފާޅު ކުރަށްވައި މިއީ އެމެރިކާގެ އަންހެނުންނަށް ސިޔާސީ ގޮތުން ލިބިގެންދިޔަ ބޮޑު ކުރިއެރުމެއްކަން ފާހަގަ ކުރަށްވަމުންނެވެ.

ހެރިސް ވިދާޅުވީ މިއީ ކުރިއަށްއޮތްތަނުގައިވެސް ވާނޭ ކަމެއްކަމުގެ ޔަގީންކަން މިއަދުގެ ތުއްތު އަންހެން ކުދިންނަށްވެސް ސާބިތުވެގެން ހިނގައްޖެ ކަމަށެވެ. އަދި ކުރިއަށް އޮތް ޖީލުގެ އަންހެން ދަރީންނަށް ހިތްވަރަކަށް މިކަން ވާނެ ކަމަށްވެސް ހެރިސް ވިދާޅުވިއެވެ.

އަންހެނުން ބާރުވެރި ކުރުވަން ހިތްވަރުދެއްވާ ވާހަކަފުޅުދައްކަވަމުން، ލިބުނު ކާމިޔާބީއާއެކު، ކުރީ ޒަމާނުގައި އެކި ނަސްލުގެ މީހުން އެމެރިކާއަށް ހިޖުރަކޮށް ދިރިއުޅުންބިނާކޮށް އަދުގެ ދުނިޔެ އާރަސްތުކުރުމުގެ އިސްރޯލެއް އަދާކޮށްދީފައިވާ އަންހެނުންގެ ހަނދާންތައް ހެރިސް ވަނީ އާކުރައްވާފައެވެ.

ކަމަލާގެ ވާހަކަފުޅުގައި ޑިމޮކްރަސީ ކުރިއެރުވުމަށް އަންހެނުން ކޮށްފައިވާ މަަަސައްކަތްތައް ފާހަގަ ކުރައްވާ، އެމަސައްކަތް ތަކުން ލިބިވަޑައިގެންނެވި ހިތްވަރުގެ މައްޗަށް އަލިއަޅުވާލައްވާފައި ވެއެވެ.

އެމެރިކާގެ ރިޔާސީ އިންތިހާބުގައި ޖޯ ބައިޑެން އާއެކު ރަނިންގް މޭޓުގެ ގޮތުގައި ވާދަކުރެއްވި ކަމަލާ ހެރިސް ވެގެންދާނީ އެމެރިކާގެ ފުރަތަމަ އަންހެން ނާއިބު ރައީސާ އަށެވެ. އަދި މިއީ އޭޝިޔާ އަށް ނިސްބަތްވާ ކަޅުނަސްލުގެ އަންހެނަކު އެމެރިކާގެ ނާއިބު ރައީސަކަށް ވެގެންދިޔަ ފުރަތަމަ ފަހަރުވެސްމެއެވެ.