މިހާރުގެ އިންތިޚާބީ ރައީސް ޖޯ ބައިޑެން އެމެރިކާގެ ރައީސަކަށް ވަޑައިގެންފިނަމަ ކޮވިޑަށް ވެކްސިނެއް ލިބެން 4 އަހަރު ނަގާނެކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެއެވެ.

ަޑޮނަލްޑް ޓްރްމްޕް މިހެން ވިދާޅުވެފައިވަނީ އެމެރިކާގެ ނިމިދިޔަ ރިޔާސީ އިންތިހާބުން ލިބުނު ނާކާމިޔާބީ ގަބޫލު ނުކުރައްވަވާ ދައްކަވަމުން ގެންދަވާ ވާހަކަފުޅުތަކުގެ ތެރެއިންނެވެ.

ޓްރަމްޕް ވިދާޅުވާ ގޮތުގަައި ބައިޑެން އެމެރިކާގެ ރައީސަކަށް ވަޑައިގެންފިނަމަ ކޮވިޑަށް ވެކްސިނެއް ލިބެން 4 އަހަރު ނަގާނެއެވެ. އަދި ވެކްސިނަށް ފުޑް އެންޑް ޑްރަގް އޮތޯރިޓީއިން ލިބެންވާ ހުއްދަ ލިބުމުގައިވެސް ލަސްތަކެއް ކުރިމަތިވާނެ ކަމަށް ވިދާޅުވެފައިވެއެވެ. މީގެއިތުރުން މިފަދަ ބިއުރޮކްރެސީތަކުން އެތައް މިލިއަން މީހުންގެ ފުރާނައަށް ގެއްލުންވާނެ ކަމަށްވެސް ޓްރަމްޕް ވަނީ ވިދާޅުވެފައެވެ.

މީގެ އިތުރުން، އެމެރިކާގައި ނިމިދިޔަ ރިޔާސީ އިންތިހާބުގެ ނަތީޖާގައި ޓްރަމްޕް އާއި ދެކޮޅަށް ވާދަ ކުރެއްވި އިދިކޮޅު ޑިމޮކްރެޓިކް ޕާޓީގެ ކެންޑިޑޭޓަށް ލިބެމުން ދިޔަ ވޯޓު އިތުރުވުމާއެކު، ނުރުހުން ފާޅުކޮށް، ވޯޓު ގުނުން ހުއްޓައިލުމަށްވެސް ޓްރަމްޕް ވަނީ މަސައްކަތް ކުރައްވާފައެވެ. ޓްރަމްޕްގެ މަސައްކަތް ނާކާމިޔާބު ވެވަޑައިގަތުމުން، ޓްރަމްޕް ގެންދަވަނީ ރިޔާސީ އިންތިހާބު ކާމިޔާބު ކުރެއްވި ޖޯ ބައިޑެން އާމެދު ހަގީގަތެއްނެތް އެތަކެއް ތުހުމަތުތަކެއް ކުރައްވަމުންނެވެ.

އެމެރިކާގެ ނިމިދިޔަ ރިޔާސީ އިންތިހާބު، ޖޯ ބައިޑެން ވަނީ ބޮޑު ތަނުން ކާމިޔާބު ކުރައްވާފައެވެ. ޖޯ ބައިޑަން އަށް 74،847،843 ވޯޓު ލިބިވަޑައިގެންފައިވާއިރު މިއީ އެމެރިކާގެ ފާއިތުވެދިޔަ ދެ ރިޔާސީ އިންތިހާބާ އަޅާ ބަލާއިރުވެސް އެންމެ ގިނަ ވޯޓު ލިބިގެން އެމެރިކާގެ ރައީސަކު ހޮވުނު ފުރަތަމަ ފަހަރެވެ.