އެންމެ ފުރަތަމަ ކޮވިޑަށް ވެކްސިން ލިބޭނެ ގައުމުތަކުގެ ލިސްޓުގައި ސައޫދީ އަރަބިއްޔާ ހިމެނޭނެ ކަމަށް ސައުދީ އަރަބިއްޔާގެ ޑެޕިއުޓީ މިނިސްޓަރ ފޯ ޕްރިވެންޓިވް ހެލްތު، ޑރ. އަބްދުﷲ އަލް އަޒިރީ ވިދާޅުވެއްޖެއެވެ.

ސައޫދީ އަރަބިއްޔާއަށް ވެކްސިން ފޯރުކޮށްދިނުމަށް ވެކްސިން އުފައްދާ ކުންފުނިތަކުގެ ތެރެއިން ދެތިން ކުންފުންޏަކާ އެކު ސައޫދީ ސަރުކާރުން އެއްބަސްވެފައިވާކަމަށް ސައުދީ ޓީވީ އަށް މައުލޫމާތު ދެއްވަމުން ޑރ އަބްދުﷲ އަލް އަޒިރީ ވިދާޅުވެފައިވެއެވެ. މިއާއެކު ސައުދީ އަރަބިއްޔާ ވެގެންދާނީ އެންމެ ފުރަތަމަ ކޮވިޑަށް ވެކްސިން ލިބޭނެ ގައުމުތަކުގެ ތެރެއިން ގައުމަކަށް ކަމަށް ވެސް ޑރ. އަބްދުﷲ އަލް އަޒިރީ ވިދާޅުވެފައިވެއެވެ.

ނަމަވެސް ސައޫދީ ސަރުކާރުން ވެކްސިން ހޯދުމަށް އެއްބަސްވެފައިވަނީ ކޮން ކުންފުންޏަކާ އެކުގައިކަމެއް ސައުދީ ސަރުކާރުން ހާމަކޮށްފައެއްނުވެއެވެ.

ވެކްސިން ލިބުމުގެ އުއްމީދު އޮތް ނަމަވެސް ވެކްސިން ލިބި، ވެކްސިން ފޯރުކޮށްދެވެންދެންވެސް މާސްކް އެޅުމާއި، ގައިދުރުކަން ބެހެއްޓުމަށް ސައުދީ އަރަބިއްޔާގެ ސިއްހީ ވުޒާރާއިން ވަނީ އިލްތިމާސް ކޮށްފައެވެ. އަދި ބަލީގެ އަސަރު އެއްވެސް ވަރަކަށް ފެންނަމުންދާނަމަ ވީހާވެސް އަވަހަކަށް ކޮވިޑަށް ޓެސްޓު ހެދުމަށް ކަނޑައެޅިފައިވާ ކްލިނިކްތަކަށް ދިއުމަށްވެސް ސިއްހީ އިދާރާތަކުން ވަނީ އިލްތިމާސް ކޮށްފައެވެ.

މީގެ އިތުރުން ކޮވިޑުގެ އަލާމާތެއް ނުފެނުނަސް ކޮވިޑް ޖެހިފައިވާ މީހަކާ އެކު ޑައިރެކްޓް ކޮންޓެކްޓް ވެެއްޖެނަމަ ސިއްރުކުރުމުގެ ބަދަލުގައި ސިއްހީ ވުޒާރާތަކަށް މައުލޫމާތު ދިނުމަށްވެސް ސައުދީ އަރަބިއްޔާގެ ސިއްހީ ވުޒާރާއިން ވަނީ އިލްތިމާސް ކޮށްފައެވެ.

ސައޫދީ އަރަބިއްޔާގައި މިހާތަނަށް 350،000 އަށް ވުރެއް ގިނަ މީހުން ވަނީ ކޮވިޑަށް ޕޮޒިޓިވްވެފައެވެ. އަދި މިބަލީގައި 5600 އަށް ވުރެއް ގިނަ މީހުން މަރުވެފައިވާއިރު، މިހާތަނަށް ކޮވިޑް ޖެހިފައިވާ މީހުންގެ ތެރެއިން 339،000 އަށް ވުރެ ގިނަ މީހުން ވަނީ ބަލިން ރަނގަޅުވެފައެވެ.