އެމެރިކާގައި ނިމިދިޔަ އިންތިހާބާ ގުޅޭގޮތުން ދޮގުމައުލޫމާތު ފަތުރާކަމަށް ތުހުމަތުކޮށް ޓްވިޓާ އިން 300،000 ޓްވީޓެއް ފްލެގް ކޮށްފިއެވެ.

ޓްވިޓާ އިން މިދިޔަ ބުރާސްފަތި ދުވަހު ނެރެފައިވާ ބަަަޔާނެއްގައި ބުނެފައިވާގޮތުން އޮކްޓޯބަރުމަހު 27 ވަނަ ދުވަހުން ފެށިގެން ނޮވެމްބަރު މަހުގެ 11 ވަނަ ދުވަހާ ހަމައަށް އެމެރިކާގެ ނިމިދިޔަ އިންތިހާބާ ގުޅޭގޮތުން ދޮގުމައުލޫމާތު ފަތުރާކަމަށް ތުހުމަތުކުރެވޭ 300،000 ޓްވީޓެއް ފްލެގް ކޮށްފައިވެއެވެ.

ޓްވީޓްތައް ފްލެގް ކުރުމާއެކު ޓްވީޓްތަކަށް ލައިކްދީ އަދި ރީޓްވީޓް ވެސް ނުކުރެވޭ ގޮތަށް ވަނީ ހަދާފައެވެ. މީގެ ތެރެއިން ބައެއް ޓްވީޓްތައް އެހެން މީހުންނަށް ނުފެންނަގޮތަށް މި ޓްވީޓްތަކުގައި އިންޒާރުގެ މެސެޖެެއް ހިމަނާފައިވެސްވެއެވެ.

އެމެރިކާގައި ނިމިދިޔަ އިންތިހާބުގެ ވޯޓު ގުނުން ކުރިއަށް ދިޔަ ވަގުތު، ޓްވިޓާގައި ވޯޓުގެ ނަތީޖާ އާއި ބެހޭގޮތުން ދޮގު ހަބަރު ފެތުރުން ގިނަވުމާއެކު، 389 ފަހަރު ވޯޓުގެ ސައްހަ ނަތީޖާ ހޯދުމަށް އިލްތިމާސްކޮށް މެސެޖް ފޯރުކޮށްދެވުނު ކަމަށްވެސް ޓްވިޓާ އިން ހާމަކޮށްފައިވެއެެވެ.

އެމެރިކާގެ ނިމިދިޔަ އިންތިހާބުގެ ނަތީޖާ ގަބޫލުނުކުރައްވާ އެންމެ އިސްކޮށް އަޑު އުފުއްލަވަމުން ގެންދަވަނީ އެމެރިކާގެ ރައީސް ޑޮނަލްޑް ޓްރަމްޕްއެވެ. މިގޮތުން އިންތިހާބުގައި ކޮރަޕްޝަން ހިމެނޭ ކަމަށް ވިދާޅުވެ އިންތިހާބުގެ ވޯޓު އަލުން ގުނުމަށް ގޮވާލައްވާ ޓްރަމްޕް ވަނީ ޓްވީޓް ކުރައްވާފައެވެ. އަދި ވޯޓުގެ ސައްހަކަމާއި ވޯޓު ގުނުމާމެދު ގާނޫނީ ގޮތުން ފިޔަވަޅު އަޅުއްވާނެ ކަމަށް ވިދާޅުވެ ޓްރަމްޕް ވަނީ ޓްވީޓް ކުރައްވާފައެވެ.

ޓްރަމްޕް އާއެކު ޓްރަމްޕްގެ ގިނަ ސަޕޯޓަރުންވެސް އެމެރިކާގައި ނިމިދިޔަ އިންތިހާބުގެ ނަތީޖާ ގަބޫލުނުކޮށް އިންތިހާބުގެ ނަތީޖާގެ ސައްޙަކަން އޮޅޭ ގޮތައް ދަނީ ޓްވީޓް ކުރަމުންނެވެ.