ކޮވިޑުން ރައްކާތެރިވުމަށް ބޭނުންވާ ވެކްސިން މިއަންނަ އޭޕްރީލް މަހު އެމެރިކާގެ ރައްޔިތުންނަށް ލިބޭނެ ކަމަށް އެމެރިކާގެ ރައީސް ޑޮނަލްޑް ޓްރަމްޕްް ވިދާޅުވެއްޖެއެވެ.

އެމެރިކާގެ ރައީސް ޑޮނަލްޑް ޓްރަމްޕްް މިހެން ވިދާޅުވެފައިވަނީ ކޮވިޑުން ރައްކާތެރިވުމަށް ބޭނުންވާ ވެކްސިން ހޯދުމަށް ކުރެވެމުންދާ މަސައްކަތާ ބެހޭގޮތުން ވާހަކަ ދެއްކެވުމަށް ރޭ ބޭއްވެވި ނޫސްވެރިންގެ ބައްދަލުވުމެއްގައެވެ. މި ނޫސްވެރިންގެ ބައްދަލުވުމުގައި އެމެރިކާގެ ރައްޔިތުންނަށް ހިލޭ ވެކްސިން ލިބޭނެކަމަށްވެސް ޓްރަމްޕް ވިދާޅުވެފައިވެއެވެ.

"އަހަރުމެން ކޮށްފައިވާ އިންވެސްޓް ތަކުން ފައިޒަރ ކުންފުނީގެ ވެކްސިން ހިލޭ އެމެރިކާ ރައްޔިތުންނަށް ފޯރުކޮށްދެވޭނެ." މީގެ އިތުރުން ފައިޒަރގެ ވެކްސިން ކުއްލި ހާލަތުގައި ބޭނުން ކުރުމަށް ވަރަށް އަވަހަށް ހުއްދަ ލިބޭނެ ކަމަށްވެސް ޓްރަމްޕް ވިދާޅުވެފައިވެއެވެ.

ވެކްސިންގެ އުއްމީދު އާވެފައިވާއިރު ހުސްވިހަފްތާ ވެގެންދިޔައީ އެމެރިކާގައި އެތައްބަޔަކު ކޮވިޑަށް ޕޮޒިޓިވްވި ހަފްތާއަކަށެވެ. މިގޮތުން ހުސްވި ހަފްތާގައި އެވަރެޖްކޮށް ދުވާލެއްގެެމައްޗަށް އެއްލަކައަށްވުރެއްގިނަ މީހުން ޕޮޒިޓިވްވެފައިވެއެވެ. މީގެ އިތުރުން 150،000 އަށްވުރެއް ގިނަ މީހުން ޕޮޒިޓިވްވެ އެއްދުވަސް މަތިން އެންމެ ގިނަމީހުން ޕޮޒިޓިވްވި ދުވަސް ރިޕޯޓުކުރެވިފައިވަނީވެސް ހުސްވި ހަފްތާގައެވެ.

އެމެރިކާގެ ރައީސް ޑޮނަލްޑް ޓްރަމްޕްް ރޭ ބޭއްވެވި ނޫސްވެރިންގެ ބައްދަލުވުން ވެގެންދިޔައީ އެމެރިކާގެ ރިޔާސީ އިންތިހާބު ނިންމައި ވޯޓުގެ ނަތީޖާ ގަބޫލު ނުކުރައްވާކަމަށް ވިދާޅުވުމަށްފަހު، ބޭއްވެވި ފުރަތަމަ އާންމު ބައްދަލުވުމަށެވެ.

އެމެރިކާގެ ރިޔާސީ އިންތިހާބުން މިހާތަނަށް އާންމުކޮށްފައިވާ ވޯޓުގެ ނަތީޖާއިން 306 އިލެކްޓޯރަލް ވޯޓު ލިބިވަޑައިގެން ކުރީގައި އުޅުއްވަނީ އިދިކޮޅު ޑިމޮކްރެޓިކް ޕާޓީގެ ކެންޑިޑޭޓް ޖޯ ބައިޑެންއެވެ. އަދި ރިޔާސީ އިންތިހާބުގައި ވާދަކުރެއްވި އެމެރިކާގެ ރައީސް ޑޮނަލްޑް ޓްރަމްޕަށް ލިބިވަޑައިގަތީ ޖުމްލަ 232 އިލެކްޓޯރަލް ވޯޓެވެ.