ކޮޑް ލިވަރ ތެޔޮގުޅަ ނުވަތަ ކޮޑްލިވަ އޮއިލް އާންމުކޮށް ބޭނުންކުރާ މީހުންގެ ފަރާތުން ކޮވިޑުގެ ރިސްކު ކުޑަކޮށްދޭކަމަށާއި، އަދި ކޮވިޑުގެ ސަބަބުން ސިއްހީ ހާލުދެރަވުން ކުޑަކޮށްދޭކަމަށް ނޯވޭގެ ސައިންސްވެރިންގެ ދިރާސާ އަކުން ދައްކައިފިއެވެ.

މިއަހަރު މެދުތެރޭގައި ނޯވޭގެ ސައިންވެރިން ފަށާފައިވާ މިދިރާސާގެ ތަހުލީލުތަކުން ކޮޑް ލިވަރ ތެޔޮގުޅަ އާންމުކޮށް ބޭނުންކުރާ މީހުންގެ ފަރާތުން ކޮވިޑް ޖެހުމުގެ ފުރުސަތު ކުޑަކަމަށް ދައްކާފައިވާކަމަށް މިދިރާސާގެ ސައިންސްވެރިން ހާމަކޮށްފައިވެއެވެ.

މިދިރާސާއިން މިހާތަނަށް ކުރެވިފައިވާ ސައިންޓިފިކް ތަހުލީލުތަކުގައި އޮމެގާ-3 ފެޓީއެސިޑް އަދި ވިޓަމިން ޑީ ބޭނުން ކުރެވިފައިވާއިރު، މިއީ ކޮޑް ލިވަރ ތެޔޮގުޅައިގައިވެެސް ހިމެނޭ ދެމާއްދާއެވެ. މިގޮތުން ކޮޑް ލިވަރ ތެޔޮގުޅައިން ފުއްޕާމޭގެ އެކި އިންފެކްޝަންތަކުން ސަލާމަތް ވުމާއި އަދި ކޮވިޑުން ރައްކާތެރިވުމަށް ބޭނުން ކުރެވިދާނެކަމަަށް ލަފާކުރެވޭ ކަމަށް މިދިރާސާގެ ސައިންސްވެރިން ހާމަކޮށްފައިވެއެވެ.

މިއާއެކު ކޮރޯނާ ވައިރަހާ ދެކޮޅަށް ކޮޑް ލިވަރ ތެޔޮގުޅަ އެހީތެރިވޭތޯ ބެލުމަށް ކުރަމުންދާ މިދިރާސާ އިތުރަށް ފުޅާކޮށް، ކޮޑް ލިވަރ ތެޔޮގުޅަ ވައިރަހާ ދެކޮޅަށް މަސައްކަތް ކުރޭތޯ އާއި، ކޮޑް ލިވަރ ތެޔޮގުޅަ ބޭނުންކުރާ މީހުންގެ ސިއްހަތު އާންމުކޮށްވެސް ރަނގަޅުކަން ޔަގީންވެގެން ދާނެކަމަށް ނޯވޭގެ ސައިންވެރިން ހާމަކޮށްފައިވެއެވެ.

މިގޮތުން 70،000 މީހުންނާއެކު މިދިރާސާ ފުޅާކުރުމަށް ހަމަޖެހިފައިވާއިރު މިއަންނަ އަހަރުގެ އޭޕްރީލް މަހާއި ހަމައަށް މިދިރާސާ ދެމިގެންދާނެެވެ.

އަދި މިދިރާސާ ކާމިޔާބުވެއްޖެނަަމަ ވައިރަހާ ދެކޮޅަށް ކޮޑް ލިވަރ ތެޔޮގުޅަ ބޭނުން ކުރެވޭނެކަމަށް މިދިރާސާގެ ސައިންސްވެރިން ހާމަކޮށްފައިވެއެވެ. މިއާއެކު މާބޮޑު ހަރަދެއްނުކޮށް ކޮވިޑުން ރައްކާތެރިވާން ލިބޭ ހަތިޔާރަކަށް ކޮޑް ލިވަރ ތެޔޮގުޅަ ވެގެންދާނެކަމަށްވެސް މިދިރާސާގެ ސައިންސްވެރިން ހާމަކޮށްފައިވެއެވެ.