ކަޅު އޭލިއަން އަކަަށް ބަދަލުވުމުގެ ބޭނުމުގައި، ފްރާންސްއަށް ނިސްބަތްވާ މީހަކު އޭނާގެ ނޭފަތާއި މަތީ ތުންފަތް ނަގައިފިއެވެ.

އިންސާނުންގެ މޫނުމައްޗަށާއި، ހަށިގަނޑަށް އެކި އާދަޔާ ހިލާފު ބަދަލު ގެނައުމަކީ ދުނިޔޭގެ އެކި ކަންކޮޅުތަކުގައި މިހާރު އާންމު ކަމެކެވެ. މިގޮތުން، އުމުރުން 32 އަހަރުގެ އެންތޮނީ ލޮފްރެޑޯ ނަމަކަށް ކިޔުނު މިމީހާވެސް ކަޅު އޭލިޔަން އަކަށް ބަދަލު ވުމަށް، ސްޕެއިން އަށް ގޮސް މޫނުމަތީގެ އެތައް އޮޕަރޭޝަން ތަކެއް ކޮށްފައިވެއެވެ.

އެންތޮނީ ކޮށްފައިވާ އޮޕަރޭޝަން ތަކުގެ ތެރޭގައި، އޭނާ ވަނީ ނޭފަތާއި މަތީ ތުންފަތް ބުރިކޮށްލާފައެވެ. އަދި މީގެ އިތުރުން ލޮލުގެ ހުދުބަޔާއެކު، މުޅި މޫނުމަތި ވަނީ ޓެޓޫ ޖަހައި ކަޅު ކުލައިން ފުރާލާފައެވެ. މިބަދަލު ތަކާއެކު، އެންތޮނީގެ އަސްލު ސިފަ ވަނީ މުޅިން ގެއްލިފައެވެ.

ހަށިގަނޑަށް ގެނެވުނު ބަދަލުތަކުގެ ވާހަކަ ދައްކަމުން އެންތޮނީ ވަނީ އޭނާގެ ދޫ މެދުން ދެފަޅި ވާގޮތަށް ކަފާލައިފާކަމަށްވެސް ހާމަކޮށްފައެވެ. އެންތޮނީގެ ވާހަކަ ތަކުން އޭނާގެ ހަށިގަނޑަށް ގެނެވުނު ބަދަލު ތަކުގެ ތެރެއިން މަތީ ތުންފަތް ކަފައިލުމުން ވާހަކަ ދެއްކުމަށް ކޮންމެވެސް ވަރަކަށް އުނދަގޫވާކަމަށް ވަނީ ބުނެފައެވެ.

ނަމަވެސް އަދި މިވަރަކުން ނުފުދެއެވެ. އެންތޮނީ ދެން އެންމެ ބޭނުންވަނީ ހަށިގަނޑުގެ އެކި ސަރަހައްދުތަކުގެ ހަންގަނޑު ދަނގަޑަށް ބަދަލު ކުރުމަށެވެ. މިއާއެކު އޭނާގެ އަތާއި، ފަޔާއި، އިނގިލިތަކާއި، ބޮލަށްވެސް އިތުރު ބަދަލު ތަކެއް ގެނައުމަށް ވިސްނަމުން ދާކަމަށް އެންތޮނީ ވަނީ ހާމަކޮށްފައެވެ.