ކޮވިޑުން ރައްކާތެރިވުމަށް އެމެރިކާގެ ނޯވެކްސް ކުންފުނިން އުފައްދާފައިވާ ވެކްސިނަކީ 89 އިންސައްތަ ރައްކާތެރި ވެކްސިނެއް ކަމަށް ތަހުލީލުތަކުން ދައްކައިފިއެވެ.

އިނގިރޭސިވިލާތުގައި ކުރިއަށް ގެންދެވުނު ވެކްސިނުގެ ތަހުލީލުތަކުގެ މައްޗަށް ބިނާކޮށް ވެކްސިނުގެ ރައްކާތެރިކަން އެމެރިކާގެ ނޯވެކްސް ކުންފުނިން އިއުލާންކޮށްފައިވަނީ މިދިޔަ ބުރާސްފަތިދުވަހުއެވެ. މިތަހުލީލުތައް އިނގިރޭސިވިލާތުގެ 15،000 މީހުންގެ މެދުގައި އަދިވެސް ކުރިއަށް ގެންދާކަމަށްވެއެވެ.

މިހާތަނަށް ލިބިފައިވާ ނަތީޖާ ތަކުން ދައްކާ ގޮތުގައި މި ވެކްސިނަކީ 89 އިންސައްތަ ރައްކާތެރި ވެކްސިނެއް ކަމަށް ދައްކާފައިވީނަމަވެސް މިވެކްސިނުގެ ރައްކާތެރިކަން 96 އިންސައްތަ އާއި ހަމައަށް ގާތްކުރާނެކަމަށް އެމެރިކާގެ ނޯވެވެކްސް ކުންފުނިން ހާމަކޮށްފައިވެއެވެ.

ނޯވެވެކްސް ކުންފުނީގެ ވެކްސިނުގެ ރައްކާތެރިކަމުގެ އިންސައްތަ ކުރީގައި އުޅުނަސް، އިނގިރޭސިވިލާތުގެ ސިއްހީމާހިރުން ވަނީ މިވެކްސިން ކޮވިޑުގެ އާވެރިއަންޓާއި ދެކޮޅަށް މަސައްކުރާނެ ކަމުގެ ޔަގީންގަން ކަށަވަރު ނުވާކަމަށް ބުނެފައެވެ. ނަމަވެސް ސައުތު އެފްރިކާއިން ފެނިފައިވާ ކޮވިޑުގެ އާވެރިއަންޓާއި ދެކޮޅަށް ނޯވެވެކްސް ކުންފުނީގެ ވެކްސިން މަސައްކުރާ ކަމުގެ 60 އިންސައްތަ ޔަގީންކަން ސައުތު އެފްރިކާގައި ކުރިއަށް ގެންދެވުނު ތަހުލީލުތަކުން ވަނީ ދައްކާފައެވެ. މިނަތީޖާ އާއެކު ސައުތު އެފްރިކާއަށް ވަކިން ހާއްސަ ވެކްސިނެއް ތައްޔާރުކުރެވެމުން ދާކަމަށް ނޯވެކްސް ކުންފުނިން ހާމަކޮށްފައިވެއެވެ.

އިނގިރޭސިވިލާތުގައި ކުރިއަށް ގެންދިޔަ ވެކްސިނުގެ ތަހުލީލުތަކުގެ ނަތީޖާ އާއެކު ކޮވިޑުން ރައްކާތެރިވުމަށް އެމެރިކާގެ ނޯވެވެކްސް ކުންފުނިން އުފައްދާފައިވާ ވެކްސިނުގެ 60 މިލިއަން ޑޯޒުހޯދުމަށް އިނގިރޭސިވިލާތުން ވަނީ އެދިފައެވެ.