ކޮވިޑު ފެތުރުމުގެ އަސްލު ހޯދުމަށް ދުނިޔޭގެ ސިއްހަތު ޖަމިއްޔާއިން ކުރަމުންދާ ތަހުގީގުގެ ދަށުން ޗައިނާގެ ހުބެއި ޕްރޮވިންސްގެ ސެންޓަރ ފޯ ޑިޒީސް ކޮންޓްރޯލް އަށް ސިއްހަތު ޖަމިއްޔާގެ ޓީމުން ޒިޔާރަތްކޮށްފިއެވެ.

ކޮވިޑު ޖެހިގެން ފުރަތަމަ ރިޕޯޓު ކުރެވުނު ކޭސްތައް ރިޕޯޓުކުރެވިފައިވަނީ ޗައިނާގެ ހުބެއި ޕްރޮވިންސުންނެވެ. މިގޮތުން ކޮވިޑު ފެތުރުމުގެ އަސްލު ހޯދުމަށް ދުނިޔޭގެ ސިއްހަތު ޖަމިއްޔާއިން ކުރަމުންދާ ތަހުގީގުގެ ދަށުން ޗައިނާގެ ހުބެއި ޕްރޮވިންސްގެ އެކި ސަރަހައްދުތަކަށް ޒިޔާރަތްކުރުމަށްވެސް ހަމަޖެހިފައިވެއެވެ.

މިބަލިމަޑުކަން ދުނިޔޭގެ އެހެންގައުމުތަކަށް ފެތުރުމާއެކު، އެކި ގައުމުތަކުންވަނީ މިބަލިމަޑުކަން ފެތުރުމުގެ ތުހުމަތު ޗައިނާއަށް ކޮށްފައެވެ. މިއާއެކު މިކަން ތަހުގީގުކުރުމަށް ދުނިޔޭގެ ސިއްހަތު ޖަމިއްޔާއަށް އެތައް ގައުމަކުން ވަނީ އެދިފައެވެ.

ދުނިޔޭގެ ސިއްހަތު ޖަމިއްޔާގެ ޓީމުން ޗައިނާގައި ކުރިއަށް ގެންދާ ތަހުގީގުތައް ފަަށާފައިވަނީ ޗައިނާގެ ހުބެއި ޕްރޮވިންސްގެ ވޫހާން ސިޓީގައި ދެހަފްތާގެ މުއްދަތަކަށް ކަރަންޓީނުވުމަށްފަހުއެވެ. މިތަހުގީގު ކުރުމަށް ދުނިޔޭގެ ސިއްހަތު ޖަމިއްޔާގެ ޓީމުން ޗައިނާގައި ދެހަފްތާ ހޭދަކުރުމަށް ހަމަޖެހިފައިވެއެވެ.

މިތަހުގީގުތަކުގައި މާރުކޭޓުތަކާއި، ހޮސްޕިޓަލްތަކާއި، ވޫހާން ސިޓީގައި ކޮވިޑުގެ ބަލިމަަޑުކަން ފެތުރުން ރަމްޒުކޮށްދިނުމަށް ތައްޔާރުކުރެވިފައިވާ އެގްޒިބިޝަން އަށް ދުނިޔޭގެ ސިއްހަތު ޖަމިއްޔާގެ ޓީމުން ޒިޔާރަތް ކުރުމަށް ހަމަޖެހިފައިވެއެވެ.

ދުނިޔޭގެ ސިއްހަތު ޖަމިއްޔާގެ ޓީމުން ކުރަމުންދާ ތަހުގީގުތަކުގެ އިތުރު ތަފްސީލެއް އަދި އާންމު ކޮށްފައެއް ނުވެއެވެ.