އިންޑިޔާގެ ފިލްމީތަރި ހީނާ ޚާނާއި އޭނާގެ ލޯބިވެރިޔާ ރޮކީ، ދިވެހި ރާއްޖޭގައި ޗުއްޓީ ހޭދަކުރަމުން ދާކަމަށް އިންޑިޔާގެ ނޫސްތަކުގައި ހާމަކޮށްފިއެވެ.

ހީނާ އަދި ރޮކީ ޗުއްޓީ ހޭދަކުރަމުންދަނީ ކުރަމަތި މޯލްޑިވްސް ރިސޯޓުގައެވެ. މީގެ ދެދުވަސް ކުރިން ރާއްޖެއައިސް ޗުއްޓީހޭދަކުރަމުން އަންނަ ހީނާ ވަނީ އޭނާ ރާއްޖޭގައި ހޭދަ ކުރަމުންދާ ދުވަސްތައް ދައްކުވައިދޭ ރާއްޖޭގެ ރީތި ފޮޓޯތައް، އޭނާގެ އިންސްޓަގްރާމުގައި ހިއްސާކޮށްފައެވެ.

ނަމަވެސް ކުރު ޗުއްޓީއެއް ނިންމާލުމައްފަހު މިއަދު ރާއްޖެއިން ފުރުމަށް ހަމަޖެހިފައިވާކަން، ހީނާ ޚާން ވަނީ މީގެ ކުޑައިރުކޮޅެއްކުރިން، އޭނާގެ އިންސްޓަގްރާމްގައި ހިއްސާ ކޮށްފައެވެ.

ހީނާ ވަނީ މިދިޔަ އަހަރުގެ ނޮވެމްބަރުމަހުގެ ފަހުކޮޅު ވެސް ދިވެހި ރާއްޖޭގައި ޗުއްޓީ ހޭދަކޮށްފައެވެ. އެފަހަރު އޭނާ ޗުއްޓީ ހޭދަކޮށްފައިވަނީ ފުރަވެރި ރިސޯޓުގައެވެ.

ހިނާ ޚާން ފިލްމީ ދާއިރާއަށް ނުކުތީ 2020 ވަނަ އަހަރު ނެރުނު ހިންދީ ފިލްމު ހެކްޑް އިންނެވެ.

ފިލްމީ ދާއިރާއިން ފެނިލުމުގެ ކުރިން، 2009 ވަނަ އަހަރުން ފެށިގެން އިންޑިޔާގެ ޓީވީ ޑްރާމާތަކުންވެސް ހީނާ ޚާން ވަނީ ފެނިގެން ގޮސްފައެވެ. ހާއްސަގޮތެއްގައި، ޓީވީ ޑްރާމާ ސިލްސިލާ، ޔޭ ރިޝްތާ ކިޔާ ކެހެލާތާހެއި، ކަސޯޓީ ޒިންދަގީކީ 2 އަދި ނާގިން 5 ގައި ހީނާ ޚާން ކުޅެފައިވާ ރޯލުން ގިނަބައެއްގެ މަގުބޫލުކަން އޭނާއަށް ލިބިފައިވެއެވެ.