ޓެރަރިސްޓުންގެ ކިބައިން ޤައުމު ސަލާމަތްކުރަންޖެހޭ ކަމަށް ކުރީގެ ރައީސް، ރައީސް އަލްއުސްތާޛު މައުމޫން ޢަބްދުލް ޤައްޔޫމް ވިދާޅުވެއްޖެއެވެ.

ފުލުހުން މިއަދު ބޭއްވި ނޫސްވެރިންގެ ބައްދަލުވުމުގައި ފުލުހުން ވަނީ ރައްޔިތުން މަޖިލީހުގެ ރައީސް، ރައީސް މުހައްމަދު ނަޝީދު އަވަހާރަކޮށްލުމަށް މިމަހުގެ ހަވަނަ ދުވަހުގެރޭ ދިން ޓެރަރިސްޓު ހަމަލާގެ ވީޑިއޯ ޢާއްމުކޮށްފައެވެ. ރައީސް ނަޝީދަށް ޙަމަލާދިން މައްސަލާގައި ތުހުމަތުކުރެވޭ ހަތަރުމީހުން ތިބިކަމަށް ފުލުހުން ބުނެފައިވާއިރު އޭގެ ތެރެއިން ދެމީހުން ހައްޔަރުކޮށްފައިވާ ކަމަށްވެސް ފުލުހުން ވަނީ ބުނެފައެވެ.

އެކަމާ ގުޅިގެން ރައީސް މައުމޫން މިރޭ ވަނީ ފުލުހުންގެ މަސައްކަތަށް ތަޢުރީފު ކުރަށްވާފައެވެ. އަދި ދިވެހިރާއްޖެ ޓެރަރިސްޓުންގެ ކިބައިން ސަލާމަތްކުރަންޖެހޭ ކަމަށް ރައީސް މައުމޫން މިއަދު ވިދާޅުވިއެވެ.

Bravo @PoliceMv you are doing a great job! We must rid this country of terrorists. @presidencymv

— Maumoon Abdul Gayoom (@maumoonagayoom) May 8, 2021

ފުލުހުންގެ މަސައްކަތަށް ތަޢުރީފް ކުރަށްވަމުން އެމްއެންޑީއެފްގެ ކުރީގެ ކެޕްޓަން އަލީ އިޙްސާން ވިދާޅުވީ، ރައީސް ނަޝީދަށް ދިން ޓެރަރިސްޓް ޙަމަލާއަށް 24 ގަޑިރު ވީއިރު މައްސަލައިގެ ތަޙުޤީޤުގައި ފުލުހުން ހޯދާފައިވާ ކުރިއެރުމަކީ ފަޚުރުވެރިވާ މަސައްކަތެއް ކަމަށެވެ. އަދި އެއްވެސް ރައްޔިތަކަށް ފުލުހުންގެ ތަޙުޤީޤަށް އެއްބާލުން ދެވޭނެ ފަދަ މަޢުލޫމާތެއް ލިބިފައިވާނަމަ އެކަން ފުލުހުންނަށް ޙިއްސާ ކުރުމަށް އިޙްސާން ވަނީ އެދިވަޑައިގެންފައެވެ. އެންމެން ގުޅިގެން ޓެރަރިސްޓުން އިންސާފުގެ ކުރިމައްޗަށް ގެނެވޭނެ ކަމަށް ކެޕްޓަން އިޙުސާން މިއަދު ވިދާޅުވިއެވެ.

Very proud of the @PoliceMv investigations team and the progress made in the past 24 hours. If you have anything that can help them, regardless of whether you think its useful or not, please share with the police. Together as a nation we have to help bring terrorists to justice!

— Ali Ihusaan (@ali_ihusaan) May 8, 2021

ފުލުހުން މިއަދު ބުނީ ޓެރަރިޒަމްގެ ހަމަލާގައި ހައްޔަރު ކުރި ދެ މީހުންނަކީ ހަރުކަށި ފިކުރުގެ މީހުން ކަމަށާއި، އެ ދެމީހުންނަކީ ކުށުގެ ރެކޯޑް އޮންނަ މީހުން ކަމަށެވެ. އަދި ރޭ ބޭއްވި ޤައުމީ ދިފާޢީބާރުގެ ނޫސްވެރިންގެ ބައްދަލު ވުމުގައި މިނިސްޓަރ މާރިޔާ ވިދާޅުވެފައި ވަނީ ދިވެހި ރައްޔިތުންނަށް ބިރު ދެއްކުމަށްފަހު ޓެރަރިސްޓުންނަށް ފިލާ ނުތިބެވޭނެ ކަމަށާއި، އެމީހުން ހިފައި ހައްޔަރު ކުރުމަށް ދިވެހި ސިފައިން އެމީހުންގެ ފަހަތުން ދާނެ ކަމަށެވެ.