މަސައްކަތް ނިމުނީ ކަމަށް ބަލައި އެމެރިކާއިން އެކުލަވާލި ކޯވިޑް-19 ޓާސްކްފޯސް އުވާލުމުގެ މަޝްވަރާތައް ކުރިއަށް އެބަ ގެންދަވާކަމަށް އެމެރިކާގެ ރައީސް ޑޮނަލްޑް ޓްރަމްޕް އަންގާރަދުވަހު ވިދާޅުވެއްޖެވެ.

ޓްރަމްޕް ވިދާޅުވީ ނައިބްރައީސް މައިކް ޕެންސާއި، ޓީމުން ވަރަށް ރަނގަޅު މަސައްކަތްތަކެއް ކޮށްފައިވާކަމަށާއި، ނަމަވެސް މިހާރު އެހެން ދިމާއަކަށް އެނބުރެން ޖެހިފައިވާ ކަމަށެވެ. ކޯވިޑް-19 އާއި ދެކޮޅަށް ކުރާ ހަނގުރާމައަށް ނިމުމެއް އައީ ކަމަށް ގަބޫލުކުރައްވަނީތޯ ނޫސްވެރިން ކުރި ސުވާލަށް ޖަވާބުދެއްވަމުން ޓްރަމްޕް ވިދާޅުވީ އެގޮތަށް ގަބޫލު ނުކުރައްވާ ކަަމަށެވެ.

ބްލޫމްބަރގް އިން ރިޕޯޓުކޮށްފައިވާ ގޮތުގައި އެމެރިކާގެ އިސް ސިއްހީ މާހިރުންކަމަށްވާ އެންތަނީ ފައުޗީއާއި، ޑެބްރާ ބަރކްސް ފަދަ ބޭފުޅުން ހިމެނޭ މި ޓާސްކްފޯސް މެއި މަހުގެ ފަހުކޮޅުގައި އުވާލެވޭނެކަމަށް ޓާސްކްފޯސް ހިންގުމާއި ހަވާލުވެ ހުންނެވި އެމެރިކާގެ ނައިބު ރައީސް މައިކް ޕެންސް ވެސް ވަނީ ވިދާޅުވެފައެވެ.

އާންމު ހާލަތަކަށް ބަދަލުވުމަށް ވައިޓް ހައުސްއާއި އެމެރިކާގެ ފެޑެރަލް އެމަރޖެންސީ މެނޭޖްމަންޓް އޭޖެންސީއާއި ދެމެދުގައި މަޝްވަރާތައް ކުރިއަށް ގެންދާކަމަށް ނައިބުރައީސް ޕެންސް ވިދާޅުވިއިރު، އެކަންކަން ފެށުމަށް އެންމެ ރަނގަޅު ވަގުތެއްކަމަށް ޕެންސް ވިދާޅުވީ މެއި ނިމޭއިރު ނުވަތަ ޖޫން ފެށޭއިރު ކަމަށެވެ.

ޓާސްކް ފޯސްއިން އެމެރިކާގައި ކޯވިޑް-19 ގެ ހާލަތު ބެލެހެއްޓުމަށް ކުރަން ބޭނުންވި ހުރިހާ މަސައްކަތެއް ކުރެވިފައިވާކަން ޕެންސްގެ ވާހަކައިގައި ފާހަގަކުރެއްވިއިރު، ދުނިޔޭގައި ކޯވިޑް-19ގެ އަދަދުތައް އެންމެ ގިނައީ އެމެރިކާގައެވެ. އެމެރިކާއިން މިހާތަނަށް 1.23 މިލިއަން މީހުން ވައިރަހަށް ޕޮޒިޓިވްވެފައިވާއިރު، ބަލީގައި މަރުވި މީހުންގެ އަދަދު އުޅެނީ 72،275 ގައެވެ. އެގޮތުން، މައިކް ޕެންސް ވިދާޅުވީ، ވައިރަސް ފެތުރުން މަދުކުރެވިއްޖެކަމަށާއި، ޓާސްކްފޯސްއާއި ގުޅިގެން ރައީސް ނަންގަވާ ކޮންމެ ފިޔަވަޅެއްވެސް އަންނާނީ ޝަރުތުތަކަކާއެކުގައިކަމަށެވެ.

ޕެންސް ވިދާޅުވީ ޓާސްކް ފޯސް އުވާލިނަމަވެސް ވައިރަހާއި ދެކޮޅަށް އެމެރިކާއިން ކުރާ މަސައްކަތްތައް ދާނީ ކުރިއަށެވެ.