ރާއްޖޭގެ ބައެއް ރަށްރަށުގެ މިސްކިތްތަކަށް އިންޑިއާއިން މުދިމުން ގެންނަންޖެހޭކަމަށް މަޝްހޫރު ވިޔަފާރިވެރިޔާ އަހުމަދު އާރިފް، އާއްޓޭ ވިދާޅުވެއްޖެއެވެ.

އާއްޓޭ މިހެން ވިދާޅުވީ، އަރަބި އަދި ގުރުއާން ކިޔަވައިދިނުމަށް އިންޑިއާއިން ޓީޗަރުން ގެނައުމާއި ގުޅިގެން އެކަމަށް އިޝާރާތްކުރައްވައެވެ.

އެމްޑީޕީ ޓިކެޓުގަައި އޭދަފުށި ދާއިރާއަށް މަޖިލިސް އިންތިހާބުގައި ވާދަކުރެއްވި އާރިފް ވިދާޅުވީ، އޭދަފުށީ މިސްކިތްތަކުގައި މުދިމުން ނެތްތާ 7 އަހަރުވެއްޖެކަމަށެވެ. އަދި އެނޫންވެސް ގިނަ ރަށްތަކެއްގައި މުދިމުން ނެތްކަމަށެވެ. އެހެންކަމުން ރަށްރަށުގެ މިސްކިތްތަކަށްވެސް އިންޑިއާއިން މުދިމުން ގެންނަންޖެހޭކަމަށް އާރިފް ވިދާޅުވިއެވެ.

އާރިފް ވިދާޅުވީ ބައެއް މިސްކިތްތަކުގައި މުދިމުން ނެތްއިރު، ދީނުގެ ދިފާއުގައިކަމަށް ބުނެ ވާހަކަދައްކާ ބަޔަކުވެސް މިގައުމުގައި އުޅޭ ކަމަށެވެ.

"މަގޭ ދީނޭ އެކަމަކު ބަޔަކު ކިޔާ އެބައުޅޭ." އާރިފް ވިދާޅުވިއެވެ.

ރާއްޖޭގައި ޤުރުއާނާއި އަރަބި ކިޔަވައިދޭން އިންޑިއާ ޓީޗަރުންގެ ފުރަތަމަ ގްރޫޕް އިންޑިއާއިން ރާއްޖެއަށް އައިސްފައިވާކަމަށް އިންޑިއާގެ ބައެއް ނޫސްތަކުން ވަނީ ބުނެފައެވެ.

އިންޑިއާގެ މަޝްހޫރު ނޫހެއްކަމަށްވާ "ދަ ހިންދޫ"އިން ބުނީ އިންޑިއާއިން ރާއްޖެ އައިސްފައިވާ ޤުރުއާނާއި އަރަބި ކިޔަވައިދޭ ޓީޗަރުންނަކީ އެ ގައުމުގެ ސަރުކާރާއި ދިވެހި ސަރުކާރާ ދެމެދު ވެފައިވާ އެއްބަސްވުމެއްގެ ދަށުން ގެނައި ޓީޗަރުންތަކެއްކަމަށެވެ. އަދި މިއީ ކެރެލާ ސްޓޭޓުން ގެނައި ޓީޗަރުންތަކެއްކަމަށް އިންޑިއާގެ ނޫސްތަކުން ބުނެއެވެ.

މައުލޫމާތު ލިބިފައިވާ ގޮތުގައި އަރަތްބާއި ގުުރުއާން ކިޔަވައިދޭ ޓީޗަރުން އިންޑިއާއިން ގެނައީ "ނޮރްކާ ރޫޓްސް" ނަމަކަށްކިޔާ އެޖެންސީއެއް މެދުވެރިކޮށެވެ.

ރާއްޖެއަށް އިންޑިއާއިން ގުރުއާނާއި އަަރަބި ކިޔަވައިދޭޓީޗަރުންތަކެއް ގެނެސްފައިވާއިރު، މިކަމުގައި ސަރުކާރުން ވަކި އެއްޗެއް އަދި ނުބުނެއެވެ. ނަމަވެސް ރާއްޖޭގައި އަރަބި ބަހާއި ގުރުއާން ކިޔަވައިދިނުމުގައި މީގެކުރިން އާއްމުކޮށް އިންޑިއާ ޓީޗަރުން ހަރަކާތްތެރިވެފައެއް ނުވެއެވެ. އެ މާއްދާތައް އާއްމު ގޮތެއްގައި ކިޔަވައިދިނުމުގައި އުޅެނީ އަރަބި ޤައުމުތަކުގެ ފެންވަރު ރަނގަޅު އުސްތާޒުންނެވެ.