މާރޗް 21 ވަނަ ދުވަހު ކޯވިޑް-19 އަށް ޕޮޒިޓިވްވި ޔުވެންޓަސްގެ ފުޓުބޯޅަ ކުޅުންތެރިޔާ، ޕައުލޯ ޑިބާލާ 7 ހަފްތާއަށްފަހު ރަނގަޅު ވެއްޖެއެވެ.

ޔުވެންޓަސް އިން އިއްޔެ ކުރި ޓްވީޓެއްގައި، މާރޗް މަހުން ފެށިގެން ސެލްފް އައިސޮލޭޝަންގައި ހުރި ޔުވެންޓަސް ގެ ފޯވާޑް، ޑިބާލާ ވައިރަހަށް ނެގެޓިވްވެފައިވާކަމަށް ވަނީ ބުނެފައެވެ. އެ ޓީމުން ބުނީ ބައްޔަށް ނެގެޓިވްކަން ކަށަވަރު ކުރުމަށް ހެދި ދެ ޓެސްޓުން ވެސް އޭނާ ބައްޔަށް ނެގެޓިވްވެފައިވާ ކަމަށެވެ. އެހެންކަމުން ޑިބާލާގެ އައިސޮޅޭޝަން ގެ ހާލަތު މިހާރު ނިމިފައިވާ ކަމަށް ކްލަބުން ވަނީ ބުނެފައެވެ.

އަރޖެންޓީނާއަށް ނިސްބަތްވާ އުމުރުން 26 އަހަރުގެ ޑިބާލާއަކީ އެންމެ ފުރަތަމަ ވައިރަހަށް ޕޮޒިޓިވްވި މަޝްހޫރު ފުޓުބޯޅަކުޅުންތެރިންގެ ތެރޭގައި ހިމެނޭ ކުޅުންތެރިއެކެވެ. އެގޮތުން އޭނާއާއެކު ޔުވެންޓަސްގެ ޑެނިއެލް ރުގާނީ އަދި ބްލެއިސް މަޓުއިޑީވެސް ވަނީ ބައްޔަށް ޕޮޒިޓިވްވެފައެވެ.

މި ކުޅުންތެރިން ބައްޔަށް ޕޮޒިޓިވްވެފައިވަނީ އެންމެ ބޮޑަށް ބަލި ފެތުރުނު އެއް ސަރަހައްދު ކަމަށްވާ ޔުވެންޓަސް ނިސްބަތްވާ އިޓަލީގެ ޓޫރީންގައެވެ.