ރައީސް އިބްރާހިމް މުހައްމަދު ޞާލިޙް ދިރިއުޅުއްވާ ރިޔާސީ ގެކޮޅު ކަމަށްވާ، މުލީއާގެ ދޮށަށްގޮސް ގޮއްވާލާނެ ކަމުގެ އިންޒާރުދިން މީހާގެ ބަންދަށް 15 ދުވަސް ކޯޓުން އިތުރުކޮށްދީފި އެވެ.

އެ މައްސަލައިގައި ހައްޔަރު ކުރި ދެ މީހުންގެ ތެރެއިން އެކަކު ވަނީ ދޫކޮށްލާފައެވެ. އަދި އަނެއް މީހާގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން އޭނާގެ ބަންދަށް ކޯޓުން ފުރަތަމަ ވަނީ 7 ދުވަސް ޖަހައިދީފައެވެ. އަދި ބަންދުގެ މުއްދަތު ހަމަވާތީ، މުއްދަތު އިތުރު ކުރުމަށް ކްރިމިނަލް ކޯޓަށް ޙާޟިރު ކުރުމުން އޭނާގެ ބަންދަށް 15 ދުވަސް ވަނީ އިތުރުކޮށްފައެވެ. އެމީހާގެ ބަންދު މުއްދަތު ޖަހާފައި ވަނީ އިއްޔެ އެވެ. އޭނާއަކީ ބޮމެއް އޮތް ކަމަށް ބުނި މީހާއެވެ.

އިންޒާރުދިން ދެ މީހުން މުލިއާގެ ކައިރިއަށް ދިޔައީ ދަބަހަކާއި ރަތްކުލައިގެ ކޮތަޅެއް އަދި ކަރުދާސް ފޮއްޓެއް ހިފައިގެންނެވެ. އެމީހުން އިންޒާރުދިނީ އެ ފޮށިގަނޑުގައި ބޮމެއް އޮތް ކަމަށް ބުނެއެވެ. އެ އިންޒާރާ ގުޅިގެން ފުލުހުންނާއި ސިފައިން ވަނީ އެމީހުން ގެންގުޅުނު ސާމާނުތަކާއި އެ ފޮށިގަނޑު ބަލައި ފާސްކުރުމަށްފަހު، އެ ދެ މީހުން ހައްޔަރުކޮށްފައެވެ.

މެއިމަހުގެ ހަ ވަނަ ދުވަހު ރައީސް ނަޝީދަށް އަމާޒުކޮށް ދިން ޓެރަރިސްޓް ޙަމަލާއަށްފަހު ސަލާމަތީ ޚިދުމަތްތަކުން ގެންދަނީ މިފަދަ މައްސަލަތައް ސީރިއަސް ކަމެއްގެ ގޮތުގައި ތަޙުޤީޤު ކުރަމުންނެވެ.