ކުރީގެ ނައިބު ރައީސް އަހުމަދު އަދީބާއި ބައްދަލުކޮށް ދަބަހަކަށް އަޅައިގެން ގެންދިޔައީ "ދިޔާ އެއްޗެއް" ކަމަށާއި، ނަމަވެސް އެއީ ބަނގުރަލެއް ނުވަތަ ޙަރާމް އެއްޗެއްވެސް ނޫން ކަމަށް އެމްޑީޕީގެ ޕީޖީ ލީޑަރ އަދި މެދުހެންވޭރު ދާއިރާގެ މެމްބަރު އަލީ އާޒިމް ވިދާޅުވެއްޖެއެވެ.

އޮންލައިން ފޯރަމެއްގައި މިރޭ ވާހަކަފުޅު ދައްކަވަމުން މެދު ހެންވޭރު ދާއިރާގެ މެންބަރު އަލީ އާޒިމް ވިދާޅުވީ، އަދީބު އަތުން ގެންދެވީ ދިޔާ އެއްޗެއް ނަމަވެސް އެއީ ބަނގުރާ ނޫން ކަމަށެވެ. އަދި އެރޭ ގެންދެވީ ގާނޫނީ ގޮތުން މަނާ އަދި ހަރާމް އެއްޗެއްވެސް ނޫން ކަމަށެވެ. އާޒިމް ވިދާޅުވީ، އެރޭ ގެންދެވީ ޑިއުޓީ ފްރީ ކޮތަޅުތަކެއްގައި ހުރި އެއްޗެއް ކަަމަށެވެ.

"ދިޔާ ކޮންމެ އެއްޗަކީ ހަރާމް އެއްޗެއް ނޫން. ދިޔާ ކޮންމެ އެއްޗަކީ ރަލެއްވެސް ނޫން." އާޒިމް ވިދާޅުވިއެވެ.

އާޒިމް އިތުރަށް ވިދާޅުވީ، އޭނާގެ ދަބަހުގައި އުފުލީ ކޮންއެއްޗެއްކަން ބެލުމަށް ފުލުހުން ތަޙުޤީޤެއް ހިންގަމުންދާ ކަމަށާއި، އެ ތަޙުޤީޤު ނިމުމުން އެކަން ހާމަކުރަށްވާނެ ކަމަށެވެ. މީގެއިތުރުން އެމްއެމްޕީއާރުސީގެ ޚިޔާނާތުގެ ލިސްޓުގައި އޭނާގެ ނަން އޮތް ނަމަވެސް އެމައްސަލާގައިވެސް އަދި އޭނާއާއި ސުވާލެއް ކޮށްފައި ނުވާ ކަމަށާއި، އެސެޓް ރިކަވަރީ ކޮމިޝަން ވަނީ ފެއިލް ވެފައިކަމަށް އާޒިމް ވިދާޅުވިއެވެ.

އާޒިމްގެ ގާތް އެކުވެރިއެއް ކަމަށްވާ ކުރީގެ ނާއިބު ރައީސް އަޙްމަދު އަދީބާއި ބައްދަލުކުރެއްވުމަށް މަޝްހޫރު ހާމިދުސޭޓުގެ ގެޔަށް ދަބަހެއް ހިއްޕަވައިގެން ވަޑައިގެންނެވުމަށް އާޒިމްގެ ގާތުގައި އަދީބު އެދިފައިވާ މެސެޖެއް ސޯޝަލް މީޑިއާގައި ވަނީ ލީކުވެފައެވެ. އަދި އާޒިމް ވަނީ އެއީ އަސްލު މެސެޖެއް ކަމަށް އޮންލައިން މީޑިއާ އަކަށް ދެއްވި އިންޓަވިއު އެއްގައި އިޢުތިރާފްވެ ވަޑައިގެންފައެވެ.

އެމްއެމްޕީއާރުސީ ޚިޔާނާތުގެ ފައިސާ ލިބުނު ފަރާތްތަކުގެ ލިސްޓުގައި އާޒިމްގެ ނަން ހިމެނިފައިވާއިރު ބައެއް ފަރާތްތަކުން ތުހުމަތު ކުރަނީ މިއީ އެ ވާހަކަ އޮއްބާލައި، މުޅިން އެހެން އަމާޒަކަށް މީހުންގެ ފޯކަސް އަނބުރާލުމަށް އާޒިމް ކުޅުއްވާ ސިޔާސީ "ގޭމެއް" ކަމަށެވެ.