ލޯކަލް ގަވަމެންޓް އޮތޯރިޓީ (އެލްޖީއޭ)ގެ ބޯޑަށް އައްޔަނުކުރުމަށް 3 ބޭފުޅަކަށް ރުހުން ދިނުމަށް ރައްޔިތުންގެ މަޖިލީހުން ފާސްކޮށްފިއެވެ.

ނުވަ މެމްބަރުންގެ މައްޗަށް އެކުލެވޭ އެލްޖީއޭގެ ބޯޑަށް އައްޔަނުކުރުމަށް 5 ބޭފުޅެއްގެ ނަންފުޅު ރައީސް ޞާލިޙްވަނީ މަޖިލީހަށް ފޮނުއްވާފައެވެ. އެއީ، ދަފްތަރު 2864، އައިމިނަތު އަލީ އާއި ބ. ކެންދޫ، ޝާޒީބިން، އައިޝަތު ޝީޒާ އާއި، މ. ލިލީސް، އަޒްހާ ޒަމީރު އާއި، ގ. ހިމާލިޔާގެ، ފާތުމަތު ނިއުމާ އިތުރުން ހ. ރައިޒިން ސަން، ފާތުމަތު ޒީނާ އަށެވެ.

އެލްޖީއޭގެ ބޯޑަށް 3 މެންބަރުން ޢައްޔަނުކުރަން ޖެހޭއިރު، ބޯޑަށް އައްޔަނުކުރުމަށް ފެންނަކަމަށް މަޖިލީހުން ރުހުންދީފައިވަނީ، މ. ލިލީސް، އަޒްހާ ޒަމީރު އާއި، ގ. ހިމާލިޔާގެ، ފާތުމަތު ނިއުމާ އިތުރުން ހ. ރައިޒިން ސަން، ފާތުމަތު ޒީނާ އަށެވެ.

އެ ބޭފުޅުންގެ ތެރެއިން އަޒްހާއަކީ ޖެންޑާ އީކުއަލިޓީ ދާއިރާއިން ތަޖުރިބާ ލިބިވަޑައިގެން ހުންނެވި ބޭފުޅެކެވެ. އަދި ނިއުމާކީ ގަވާނަންސް ނުވަތަ ޕަބްލިކް އެޑްމިނިސްޓްރޭޝަންގެ ދާއިރާއިން ތަޖުރިބާ ލިބިވަޑައިގެން ހުންނެވި ބޭފުޅެކެވެ. އަދި ޒީނާއަކީ މަދަނީ ޖަމިއްޔާގެ މެންބަރެކެވެ.

ރައްޔިތުންގެ މަޖިލީހުގެ ލާމަރުކަޒީ ކޮމިޓީން މަޖިލީހުގެ ތަޅުމަށް ފޮނުއްވި ނަންފުޅުތައް އެލްޖީއޭގެ ބޯޑަށް އައްޔަންކުރަން މަޖިލީހުން ފާސްކުރީ، ރައްޔިތުންގެ މަޖިލީހުގެ މިއަދުގެ ޖަލްސާގައެވެ.

ލާމަރުކަޒީ ގާނޫނުގެ ދަށުން އެލްޖީއޭގެ ބޯޑުގައި ރައީސުލްޖުމްހޫރިއްޔާ އައްޔަން ކުރައްވާ ވަޒީރަކާއި ޖެންޑާ އިކުއަލިޓީގެ ދާއިރާއިން ތަޖުރިބާ ލިބިފައިވާ އަންހެން މެމްބަރަކާއި ގަވަނަންސް ނުވަތަ ޕަބްލިކް އެޑްމިނިސްޓްރޭޝަންގެ ދާއިރާއިން ތަޖުރިބާ ލިބިފައިވާ މެމްބަރަކާއި މަދަނީ ޖަމިއްޔާއެއްގެ މެމްބަރެއް ވެސް ހިމެނެން ޖެހެ އެވެ. އޭގެ އިތުރުން ދެން އެލްޖީއޭގެ ބޯޑުގައި ތިއްބަވާނީ ސިޓީ ކައުންސިލަރުންގެ ތެރެއިން މެންބަރަކާއި ރަށު ކައުންސިލަރުންގެ ތެރެއިން މެންބަރެއް އަދި އަތޮޅު ރައީސުންގެ ތެރެއިން މެންބަރަކާއި، ފިނޭންސް މިނިސްޓްރީން މިނިސްޓަރު ކަނޑައަޅާ މުވައްޒަފެކެވެ.

ފަސް އަހަރުގެ ދައުރެއް ކަނޑައަޅާފައިވާ އެލްޖީއޭ ބޯޑުގެ ސީއީއޯ އަކީ ފާތިމަތު އަފްޝަން ލަތީފް އެވެ.