ހިޔާ މަޝްރޫއުގެ ދަށުން ފްލެޓް ލިބިފައިވާ މީހުންގެ ތެރެއިން، 15 އިންސައްތަ މީހުން ފްލެޓް އެއްބަސްވުންތަކުގައި ސޮއިކޮށްފައިނުވާ ކަމަށް ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ)ގެ މެނޭޖިން ޑިރެކްޓަރު، ސުހައިލް އަހުމަދު ވިދާޅުވެއްޖެއެވެ.

ދަޢުލަތުގެ މީޑިއާގައި ވާހަކަ ދައްކަވަމުން ސުހައިލް ވިދާޅުވީ، ހިޔާ ފްލެޓް ލިބުނު މީހުންގެ ތެރެއިން ސޮއިކުރަން 5،596 މީހުން ޝެޑިއުލް ކުރެވިއްޖެ ކަމަށާއި، ނަމަވެސް މިހާތަނަށް އެއްބަސްވުމުގައި ސޮއިކޮށްފައިވަނީ، 5،483 ފަރާތަކުން ކަމަށެވެ. އަަދި ފްލެޓް ބަދަލުކުރުމަށް ހުޅުވާލި ފުރުސަތުގައި 400 ފަރާތަކުން ފްލެޓް ބަދަލު ކުރަން ބޭނުންވެގެން އަންގާފައިވާތީ، އެފަރާތްތަކުގެ އެއްބަސްވުންތަކުގައި ސޮއި ކުރުން ލަސްކޮށްފައިވާ ކަމަށްވެސް ސުހައިލް ވިދާޅުވިއެވެ.

މިހާތަނަށް ފްލެޓް އެއްބަސްވުމުގައި ސޮއި ކޮށްފައިނުވާ ދުއިސައްތައެއްހާ މީހުންނަށް އެއްބަސްވުމުގައި ސޮއި ކުރަން ޑެޑްލައިނެއްވެސް ކަނޑައަޅާނެ ކަަމަށް ސުހައިލް ވިދާޅުވިއެވެ. އޭގެ އިތުރުން މި ސަރުކާރުން ހުޅުމާލޭގައި "ވިނަރެސް"ގެ ނަމުގައި އަޅާ 3 ކޮޓަރީގެ ފްލެޓްތަކަށް 250 ފަރާތަކުން ނަން ނޯޓު ކޮށްފައިވާކަމަށްވެސް ސުހައިލް ވަނީ ވިދާޅުވެފައެވެ.

ހިޔާ މަޝްރޫއުގެ ފްލެޓްތަކުގެ އަދަދަކީ 7،000 ކަމުގައި ރައީސް ޔާމީންގެ ސަރުކާރުން ކަނޑައަޅާފައި އޮތް ނަމަވެސް ފްލެޓް ތަކުގެ ގްރައުންޑް ފްލޯ، ޓަވަރުތަކުގައި ދިރިއުޅޭ މީހުންގެ އަސާސީ ބޭނުންތަކުގެ ވިޔަފާރިއަށް މި ސަރުކާރުން ހާއްސަ ކުރުމުން އެ އަދަދު ވަނީ 6،720 އަށް ކުޑަވެފައެވެ.

ހިޔާ ފްލެޓްތައް ހަވާލުކުރުމުގެ މަސައްކަތްކުރަމުންދާއިރު، އެ ފްލެޓްތަކުން ކުލި ނަގަން ފަށާނީ އަންނަ ޑިސެމްބަރުމަހުން ފެށިގެންކަމަށް އެޗްޑީސީން ވަނީ ހާމަކޮށްފައެވެ.