ހުޅުމާލޭ ފޭސް 2 ގައި ދެ ސްކޫލެއް އިމާރާތް ކޮށްދޭނެ ބަޔަކު ހޯދުމަށް ދަޢުލަތުގެ މާލީ ވުޒާރާއިން އިޢުލާނު ކޮށްފިއެވެ.

މާލީ ވުޒާރާއިން ނެރެފައިވާ އިއުލާނެއްގައި ބުނީ، ހުޅުމާލޭ ފޭސް 2 ގައި ދެ ސްކޫލެއް އިމާރާތްކޮށްދޭނެ ބަޔަކު ހޯދުމަށް ދެވަނަ ފަހަރަށް އިއުލާނު ކުރީ، ކުރިން ކުރި އިއުލާނަށް އެކަށީގެންވާ ތަރުހީބެއް ނުލިބުމުން ކަމަށެވެ. އެމަސައްކަތް ކުރުމަށް އެންމެ ފުރަތަމަ އިއުލާންކޮށްފައިވަނީ މިދިޔަ ޑިސެމްބަރު މަހުގެ ތެރޭގައެވެ.

މާލީ ވުޒާރާގެ އިޢުލާނުގައި ބުނެފައިވަނީ، އަލަށް ޢިމާރާތް ކުރުމަށް އިޢުލާނު ކޮށްފައިވާ ދެ ސްކޫލްގެ މަސައްކަތްތަކަށް ބީލަން ހުޅުވުން އޮންނާނީ އަންނަ ނޮވެމްބަރު މަހުގެ 17 ވަނަ ދުވަހު ކަމަށެވެ. މި ދެ މަސައްކަތަށްވެސް ބިޑު ސެކިއުރިޓީގެ ގޮތުގައި 850،000 ރުފިޔާ ދައްކަން ޖެހެއެވެ. އަދި ކޮންމެ ބީލަމެއްގައި ބައިވެރިވުމަށް 1500 ރުފިޔާ ނުވަތަ 100 އެމެރިކާ ޑޮލަރުގެ ނޮން ރިފަންޑަބަލް ރަޖިސްޓްރޭޝަން ފީއެއް ދައްކަން ޖެހޭ ކަމަށްވެސް މާލީ ވުޒާރާއިން ބުނެއެވެ.

މި މަސައްކަތުގެ ބިޑް ސެކިޔުރިޓީގެ މުއްދަތަކީ ބިޑް ހުޅުވާ ތާރީޚުން ފެށިގެން 148 ދުވަހެވެ.

ހުޅުމާލޭގައި މިހާރު ތިން ސްކޫލު ހުރެއެވެ. އެެއީ ޣާޒީ ސްކޫލާއި، ރެހެންދި ސްކޫލް އަދި ހުރަވީ ސްކޫލް އެވެ. ހުޅުމާލޭ ފޭސް 2 ގައި ޢިމާރާތް ކުރާ ފުރަތަމަ ސްކޫލު ކަމަށްވާ ޞަލާޙުއްދީން ސްކޫލް އިމާރާތް ކުރުމަށް މިއަހަރުގެ ފެބްރުއަރީ 7 ވަނަ ދުވަހު ވަނީ އަމީން ކޮންސްޓްރަކްޝަނާ ހަވާލުކޮށްފައެވެ. ހުޅުމާލޭ ދެވަނަ ފިޔަވަހީގައި 4 ސްކޫލު އެޅުމަށް މިހާތަނަށް ނިންމާފައިވާއިރު، އެޗްޑީސީން ބުނެފައިވަނީ ހުޅުމާޅޭ ދެވަނަ ފިޔަވަހީގައި ބޭރު ފަރާތަކުން ތަރައްޤީކުރާ އިންޓަރނޭޝަނަލް ސްކޫލެއްވެސް ހުންނާނެކަމަށެވެ.