އިސްލާމީ މަރުކަޒުގެ ނަމާދުކުރާ ސަރަޙައްދަށް ކުޑަކަމުދިޔަ މީހާގެ ބަންދަށް އިތުރު 10 ދުވަސް ކްރިމިނަލް ކޯޓުން ޖަހައިފިއެވެ.

މިމަހުގެ 3 ވަނަ ދުވަހުގެރޭ އިސްލާމީ މަރުކަޒުގައި މީހުން މަޣުރިބު ނަމާދަށް ތިއްބާ އިމާމާގެ ކުރިމައްޗަށް އަރައި ކުޑަކަމުދިޔަ މައްސަލައިގައި ފުލުހުން ހައްޔަރު ކޮށްފައިވަނީ އުމުރުން 40 އަހަރުގެ މ. ޝޭޑީހޯމް، ހަސަން ޒިޔާދު އެވެ. އޭނާގެ ބަންދަށް މީގެ ކުރިން ހަތް ދުވަސް ޖަހާފައިވާއިރު ބަންދުގެ މުއްދަތު އިތުރު ކުރުމަށް ކޯޓަށް ޙާޟިރު ކުރުމުން އިތުރު 10 ދުވަސް ވަނީ ޖަހާފައެވެ.

ފުލުހުން މީގެ ކުރިން ބުނެފައިވަނީ އެމީހާއަކީ ނުކުޅެދުންތެރިކަން ހުންނަ މީހެއް ކަމަށެވެ. ނަމަވެސް ސަރުކާރުގެ ކަމާބެހޭ އެހެން އެއްވެސް އިދާރާއަކުން ފުލުހުންގެ އެބަސް ކަށަވަރުކޮށެއް ނުދެއެވެ. މީގެ ކުރިން ކޯޓުގެ ބަންދުގެ މަޖިލީހުގައި ޒިޔާދު ބުނެފައިވަނީ އޭނާއަކީ ބައިޕޯލާ ޑިސްއޯޑާ ހުންނަ މީހެއް ކަމަށެވެ.

ޒިޔާދު ހަމަ އެރޭ ވަނީ މާލޭގައި ހުންނަ ހުކުރު މިސްކިތަށާއި، އިސްލާމީ މަރުކަޒުގެ އިތުރު ރައީސް އޮފީހުގެ ގޭޓަށްވެސް ކުޑަކަމު ގޮސްފައެވެ.

މިމައްސަލައާއި ގުޅިގެން ހޯމް މިނިސްޓަރ އިމްރާން ވިދާޅުވީ، މި ޢަމަލު ހިންގާފައިވަނީ މަސްތުގެ ޙާލަތުގައި ހުރި މީހެއް ކަމަށެވެ. ފުލުހުން ބުނީ އޭނާގެ ނަފުސާނީ ބައްޔެއް ހުރިތޯ މިހާރު ބަލަމުން އަންނަ ކަމަށާއި މައްސަލަ ތަޙުޤީޤު ކުރަމުން ގެންދާ ކަމަށެވެ.