ހަނގުރާމައިގެ މައިދާނުން އަނބުރާ ގެންނަ މީހުންގެ ރިހެބިލިޓޭޝަން ޕްރޮގްރާމާމެދު ކަންބޮޑުވުންތަކެއް ހުރި ކަމަށް މާލޭޭ ސިޓީީގެ ކުރީގެ މޭޔަރ ޝިފާ މުޙައްމަދު ވިދާޅުވެއްޖެއެވެ.

ގަތަރުގެ ދޯހާގައި ކުރިއަށްދިޔަ "ގްލޯބަލް ސެކިއުރިޓީ ފޯރަމް" ގައި ވާހަކަދައްކަވަމުން ދާޚިލީ ވަޒީރު އިމްރާން ޢަބްދުالله ވިދާޅުވެފައި ވަނީ، 2012 ވަނަ އަހަރާއި 2018 ވަނަ އަހަރާ ދެމެދު ގާތްގަނޑަކަށް 200 އެއްހާ ދިވެހިން ސީރިއާއާއި އިރާޤު ހަނގުރާމައިގައި ބައިވެރިވުމަށް ގޮސްފައިވާ ކަމަށެވެ. އަދި އޭގެ ތެރެއިން އަނބުރާ އަންނަ މީހުން މުޖުތަމައަށް ނެރުމުގެ ކުރިން އެމީހުންނަށް "ރީއިންޓަގްރޭޝަން" ޕްރޮގްރާމްތައް ހިންގުމަށްޓަކައި ބޭނުންވާނެ ނޭޝަނަލް ރީއިންޓަގްރޭޝަން ސެންޓަރު މިހާރު ސަރުކާރުން ޤާއިމުކޮށްފައިވާ ކަމަށް އިމްރާން ވަނީ ވިދާޅުވެފައެވެ.

އެކަމާ ގުޅިގެން ޝިފާ ވިދާޅުވީ، ވަޒީރު ފާހަގަކުރެއްވިފަދަ ރިހެބިލިޓޭޝަން ޕްރޮގްރާމެއް ރާއްޖޭގައި ހިންގިދާނެކަމުގެ ޔަޤީންކަން އަދި ނެތް ކަމަށެވެ. އެގޮތުން މި ޕްރޮގްރާމް ކުރިއަށް ގެންދަވަނީ ވަޒީރުގެ ސީދާ ބެއްލެވުމުގެ ދަށުންތޯ ޝިފާ ވަނީ ސުވާލު ކުރަށްވާފައެވެ.

ޝިފާ ވިދާޅުވީ މިފަދަ ނުރައްކާތެރިކަންބޮޑު ޕްރޮގްރާމެއް ކުރިޔަށް ގެންދިއުމަށް ރާއްޖެއަށް ފުރަތަމަ ގެންނަ ޢާއިލާއަކީ ކޮބައިކަންވެސް އެނގެންޖެހޭ ކަމަށެވެ.

ޓެރަރިޒަމް މަނާކުރާ ޤާނޫނުގެ ދަށުން އެކި ޤައުމުތަކުގެ ދާޚިލީ ހަނގުރާމައިގައި ބައިވެރިވުމަށްފަހު ރާއްޖެ އެނބުރި އަންނަ މީހުންނާއި، ގެނެވޭ މީހުން ބެއިތިއްބުމަށް ޚާއްސަ ސެންޓަރެއް ހަދާފައިވަނީ ކ. ހިންމަފުށީގައެވެ. އަދި އެމަރުކަޒުގައި ފުރަތަމަ ފަހަރަށް މީހަކު ބަންދުކޮށްފައިވާ ކަމަށްވެސް ހޯމް މިނިސްޓްރީން މިދިޔަ އަހަރުގެ އޮކްޓޯބަރ މަހުގެ ތެރޭގައި ވަނީ ބުނެއެވެ.



ހޯމް މިނިސްޓްރީން ބުނީ އެތަނުގައި ބަންދުކޮށްފައިވަނީ ހަނގުރާމަވެރި ސަރަޙައްދެއްގައި އުޅުމަށްފަހު، 2020 އޮކްޓޯބަރ 15 ވަނަ ދުވަހު އެނބުރި ދިވެހިރާއްޖެ އައި އުމުރުން 34 އަހަރުގެ ދިވެހި ފިރިހެނަކު ކަމަށެވެ. އަދި އޭނާ ކޯޓު އަމުރެއްގެ ދަށުން 30 ދުވަހަށް ބަންދުކޮށްފައިވަނީ ރިސްކް އެސެސްމެންޓް ހެދުމަށްޓަކައިކަމަށް ހޯމް މިނިސްޓްރީން ބުނެއެވެ.

ޓެރަރިޒަމް މަނާކުރުމުގެ ޤާނޫނުގެ ދަށުން ޤާއިމުކުރަންޖެހޭ މަރުކަޒުތައް ނޭޝަނަލް ރީއިންޓަގްރޭޝަން ސެންޓަރުގައި ޤާއިމުކޮށް، އެންޓި ޓޯޗަރ ޤާނޫނުގެ 17 ވަނަ މާއްދާގެ ދަށުން، ދައުލަތުގެ ބެލުމުގެ ދަށުގައި މީހުން ބަންދުކުރާ ތަނެއްގެ ގޮތުގައި އެތަން ކަނޑައަޅާ އެކަން އިއުލާން ކޮށްފައިވަނީ 2020 ވަނަ އަހަރުގެ އޮކްޓޯބަރ މަހުގެ 22 ވަނަ ދުވަހުގައެވެ.

ހޯމް މިނިސްޓްރީން ބުނީ މިއީ ހަނގުރާމަތަކުގައި ބައިވެރިވުމަށްފަހު އެނބުރި ރާއްޖެ އަންނަ މީހުންގެ ނުރައްކަލުން ދިވެހި ރައްޔިތުން ރައްކާތެރިކުރުމަށާއި، އެފަދަ މީހުން ޝަރީޢަތުގެ ކުރިމަށްޗަށް ގެނެސް ޤާނޫނުގައި އެފަދަ ކަންކަމަށް ކަނޑައެޅިފައިވާ އަދަބު ދިނުމަށްޓަކައި ކުރެވޭ މަސައްކަތަށް ލިބިގެންދިޔަ ކުރިއެރުމެއް ކަމަށެވެ.