މުވައްޒަފުން ހޯދުމަށް އަވަށްޓެރި އިންޑިއާގައި އެމްޓީސީސީން އިޢުލާނު ކޮށްފައި ނުވާނެކަމަށް އެ ކުންފުނިން ހާމަކޮށްފިއެވެ.

އެމްޓީސީސީން އިންޑިއާގެ އަފްރީން އިންޓަރނޭޝަނަލް ނަމަކަށް ކިޔާ ކުންފުންޏެއް މެދުވުރިކޮށް އިންޑިއާއިން ގިނަ އަދަދެއްގެ މުވައްޒަފުން ހޯދާކަމަށް ބުނެ ރާއްޖޭގެ މީޑިއާއަކުން ފެތުރި ޚަބަރު އެކުންފުނިން ވަނީ ދޮގުކޮށްފައެވެ.

"އެ ޚަބަރަކީ ކަނޑައެޅިގެން ހަޤީޤަތާއި ޚިލާފު ދޮގު ޚަބަރެކެވެ. އަދި އެމްޓީސީސީން އިންޑިއާއިން މުވައްޒަފުން ގެންނަން އެ ޤައުމުގައި އިޢުލާނުކޮށްފައެއް ނުވާނެއެވެ." އެ ޚަބަރު ދޮގުކޮށް އެމްޓީސީސީން ނެރެފައިވާ ބަޔާނުގައި ވެއެވެ.

އެމްޓީސީސީން ވަނީ ކުންފުނި ބަދުނާމުވާގޮތަށް އަދި ޢާއްމު ރައްޔިތުންގެ މެދުގައި ކުންފުންޏަށް އޮތް އިތުބާރު ގެއްލޭގޮތަށް މިފަދަ ޙަޤީޤަތާއި ޚިލާފު ދޮގު ޚަބަރު ނުފެތުރުމަށް އެންމެހާ ފަރާތްތަކަށް އިލްތިމާސް ކޮށްފައެވެ.

އަދި ކުންފުނީގެ ހިއްސާދާރުންނާއި، ކަސްޓަމަރުންނާއި އަދި ވިޔަފާރީގެ އެންމެހާ ބައިވެރިން ކުންފުންޏަށް ކުރަށްވަމުން ގެންދަވާ އިތުބާރަށް އެ ކުންފުނިން ވަނީ ޝުކުރު އަދާކޮށްފައެވެ.

އެމްޓީސީސީގެ މިހާރުގެ އެމް ޑީ، އާދަމް އާޒިމް ކުންފުނީގެ ހިންގުމާއި ހަވާލުވެ ވަޑައިގެންނެވި ފަހުން ކުންފުނީގައި ވަޒީފާ އަދާކުރާ ބިދޭސީންގެ އަދަދު މަދުކޮށް ދިވެހީންނަށް އެކުންފުނީގެ ފަޒީފާތައް ދިނުމަށް ގިނަ ގުނަ މަސައްކަތްތަކެއް ކުރަށްވައި އެކަމުގައި ވަރަށް ބޮޑު ކާމިޔާބީއެއް ވަނީ ހާސިލު ކުރަށްވާފައެވެ.