ހުޅުމާލޭގައި އުމުރުން 19 އަހަރުގެ އަންހެނަކު ރަހީނުކޮށްގެން ގެންގޮސް އަނިޔާ ކުރި މައްސަލައިގައި ހައްޔަރުކުރި މީހާ ދޫކޮށްލައިފިއެވެ.



ޝަރުތުތަކަކާއެކު އެމީހާ ދޫކޮށްލާފައިވާއިރު، ކޯޓުން ބުނެފައިވަނީ އޭނާ ދޫކޮށްލީ ގައިގާ އަތްލުމުގެ ކުށްކުރިކަމަށް ބެލެވޭ ހެކި ލިބިފައިވީ ނަމަވެސް، ޖިސްމާނީ ބޮޑު އަނިޔާވެރި އަމަލެއް ހިންގާފައިވާ ކަމަށް ތުހުމަތުކޮށް ތަހުގީގު ނުކުރާތީ ކަމަށެވެ.

ފުލުހުން ބުނީ އަންހެނަކަށް އަނިޔާކުރި މައްސަލައެއް މިދިޔަ އޮކްޓޯބަރ 21 ވަނަ ދުވަހުގެރޭ 01:30 ހާއިރު އެ އިދާރާއަށް ރިޕޯޓުކޮށްފައިވާ ކަމަށެވެ. އެމައްސަލައާ ގުޅިގެން އުމުރުން 19 އަހަރުގެ ފިރިހެނެއް ހައްޔަރުކޮށްފައިވާ ކަމަށް ފުލުހުން ވަނީ ބުނެފައެވެ.

އެ އަންހެން މީހާއަށް އަނިޔާކޮށްފައިވަނީ ރަހީންކޮށް ގެންގޮސްގެން ކަމަށް ފެތުރުނު ޚަބަރުތަކާ ގުޅިގެން ފުލުހުން ބުނީ އެ ފަދަ ރިޕޯޓެއް ލިބިފައި ނެތް ކަމަށެވެ. އަދި ފުލުހުންނަށް ހުށައަޅާފައިވަނީ އަންހެނަކަށް އަނިޔާކޮށްގެން އުޅޭ މައްސަލަކަމަށް ފުލުހުން ވަނީ ބުނެފައެވެ.

ފުލުހުން ބުނީ އެ މައްސަލަ އިތުރަށް ތަހުގީގު ކުރަމުން ގެންދާ ކަމަށެވެ.