މިދިޔަ އޮކްޓޯބަރ މަހުގެ 4 ވަނަ ދުވަހުގެ ވަގުތެއްގައި މާލޭގެ ބައެއް މިސްކިތްތަކަށް ކުޑަކަމުދިޔަ މީހާ އަނެއްކާވެސް މިރޭ އެޢަމަލު ތަކުރާރުކޮށްފިއެވެ.

އުމުރުން 40 އަހަރުގެ މ. ޝޭޑީހޯމް، ހަސަން ޒިޔާދު މިފަހަރު ކުޑަކަމުދިޔައީ މަޖީދިއްޔާ ސްކޫލު ކައިރީގައި ހުންނަ އިބްރާހިމް އިސްކަންދަރު މިސްކިތު ހަރިންމައިގެ ތެރެއަށެވެ.

މީގެ ކުރިން އޭނާ ވަނީ ރައީސް އޮފީހުގެ ގޭޓު ކައިރިއަށާއި ހުކުރު މިސްކިތާއި އިސްލާމީ މަރުކަޒުގެ ތެރެއަށް ކުޑަކަމު ގޮސްފައެވެ. މިކަމާ ގުޅިގެން އޭނާ ބަންދުކުރަން ކޯޓަށް ގެންދިއުމުން އޭނާ ބުނެފައިވަނީ އޭނާއަކީ ބައިޕޯލާ ޑިސްއޯޑާ ހުންނަ މީހެއްކަމަށެވެ.

ފުލުހުން ބުނީ އެ މީހާގެ މައްސަލަ ތަހުގީގުކުރުމަށްފަހު ދައުވާކޮށްދިނުމަށް އެދި މިދިޔަ މަހުގެ 24 ވަނަ ދުވަހު ޕީޖީއަށް ފޮނުވާފައިވާކަމަށެވެ. އަދި އެމީހާ މިދިޔަ މަހުގެ 25 ވަނަ ދުވަހު ބަންދުން ދޫކޮށްލާފައިވާ ކަމަށްވެސް ފުލުހުން ބުނެފައި ވެއެވެ.

ފުލުހުން ފުރަތަމަ ބުނެފައި ވަނީ އެމީހާއަކީ ނުކުޅެދުންތެރިކަން ހުންނަ މީހެއް ކަމަށެވެ. ނަމަވެސް ކަމާބެހޭ އެއްވެސް ފަރާތަކުން އެކަން ކަށަވަރުކޮށް ދީފައެއް ނުވެއެވެ.