ސްޕޯޓްސް ފިޝިންގ ނުވަތަ ކުޅިވަރަށް މަސްބޭނުމަށް ޚާއްސަކޮށް ރާއްޖޭގައި އެޅި ފުރަތަމަ ކަނދުފަތި ކުޑަވަގުތުކޮޅެއްގެ ތެރޭގައި އަޑިއަށް ހިނގައްޖެއެވެ.

ހއ. މުޅަދޫ އިރުމަތީބިތު ފުށޮޅުގައި މިއަދު އެޅި މި ކަނދުފަތި ކުޑަ ވަގުތުކޮޅެއްގެ ތެރޭގައި އަޑިއަށް ގޮސްފައިވަނީ އަންދާޒާ ކުރި ވަރަށް ވުރެ ކަނދުފަތީގެ ވާ ކުރުވުމުން ކަމަށް މަޢުލޫމާތު ލިބިފައިވެއެވެ. ރާއްޖޭގެ ކަނޑުގެ ފުންމިން ދައްކައިދޭ އެޑްމިރަލްޓީ ޗާޓުގައިވާ ގޮތުން ކަނދުފަތި އެޅި ސަރަހައްދުގެ ފުންމިނުގެ ގޮތުގައި ހުންނަނީ 180 މީޓަރެވެ. ނަމަވެސް މިއަދު މެނުއަލީ އެ ތަނުގެ ފުންމިން ބެލުމުން އެ ސަރަޙައްދުގެ ފުންމިނުގައި 600 މީޓަރު ހުރި ކަމަށް ފިޝަރީޒް މިނިސްޓްރީން ވަނީ ބުނެފައެވެ.

މިހާރު ރާއްޖޭގައި 56 ކަނދުފަތި އޮތްއިރު އަންނަ އަހަރު ކަނދުފަތީގެ ވިއުގައަށް އިތުރު 30 ކަނދުފަތި އިތުރުކުރައްވާނެކަމަށް ފިޝަރީޒް މިނިސްޓްރީން ވަނީ ހާމަކޮށްފައެވެ.

ދޮށީގެ މަސްވެރިކަމަށް ޚާއްސަކޮށްގެން ރާއްޖޭގައި އަޅާފައި ހުންނަ ކަނދުފަތި ކައިރިއަށް ޒުވާނުން ގޮސް ނަނު ފައްތައިގެން މަސް ބާނާތީ އެކަމުގެ ޝަކުވާ ދޮށީގެ މަސްވެރިކަންކުރާ މަސްވެރިން ދަނީ ކުރަމުންނެވެ. އަދި މުނިފޫހިފިލުވުމަށްޓަކައި މަސް ބާނަން ދިއުމަކީވެސް ވަރަށް މުހިންމު ކަމެއްކަމަށާއި މިކަމަށް ޚާއްސަކޮށްގެން ރަށުގެ ކައިރީގައި ސަރުކާރުން ޚާއްސަ ކަނދުފަތިތަކެއް އެޅުމަށް ހަމަޖެހިފައިވާކަމަށް މިނިސްޓްރީން ވަނީ ބުނެފައެވެ.

ފިޝަރީޒް މިނިސްޓްރީން ވަނީ މިމަހުގެ 2 ވަނަ ދުވަހު ޅ.ފާދޫ މަސްކަނދުފަތި ކަނޑައިގެން ގޮސްފައިވާތީ އެކަނދުފަތީގެ ބަދަލުގައި އައު ކަނދުފައްޗެއް ޅ.ފާދޫ އިރުއުތުރުން 10.25 މޭލު ބޭރުގައިވެސް އަޅައިފައެވެ.