މަތިވެރީގައި މީހަކަށް އަނިޔާކުރި މައްސަލާގައި ދެމީހަކު ހައްޔަރުކޮށްފި އެވެ.

ފުލުހުން ބުނީ މަތިވެރީގައި މީހަކަށް ހަމަލާދިން މައްސަލާގައި 31 އަހަރުގެ ދިވެހި ފިރިހެނަކާއި 37 އަހަރުގެ ދިވެހި ފިރިހެނަކު ހައްޔަރު ކޮށްފައިވާ ކަމަށެވެ. މަޢުލޫމާތު ލިބިފައިވާ ގޮތުގައި އެ ދެމީހުންނަކީ މަތިވެރީގައި ގެސްޓް ހައުސް ހިންގާ ވިޔަފާރިވެރިޔާ ކާށިދޫ ދާއިރާގެ މެންބަރު ޢަބްދުالله ޖާބިރުގެ ޢާއިލީ ދެމީހުންނެވެ.

ޖާބިރު މަތިވެރީގައި ހިންގާ ކާޒާ މިއާ ގެސްޓު ހައުސްގައި ރޭވަނީ އަލިފާނުގެ ހާދިސާއެއްވެސް ހިނގާފައެވެ. ފުލުހުންބުނީ އެ މައްސަލަވެސް ބަލަމުން ގެންދާ ކަމަށެވެ.

ޖާބިރުގެ ކާސާމިއާ ގެސްޓްހައުސަށް މި މަހުގެ 4 ވަނަ ދުވަހު ޓެކްނިކަލް މަސައްކަތެއް ކުރަން ދިޔަ މީހަކަށް އަނިޔާ ކުރި މައްސަލައެއް ވަނީ ފެންމަތިވެފައެވެ. އެކަމާ ގުޅިގެން އެމީހާއަށް ލިބުނު ޒަޚަމްތަކަށް އެރަށު ސިއްޙީ މަރުކަޒުން ވަނީ ފަރުވާދީފައެވެ.

އެގޮތުން އެމީހާގެ މޫނުމައްޗަށް ޒަޚަމްތަކެއް ލިބިފައިވާ ކަމަށް ވެއެވެ. ޙާދިސާ ހިނގިވަގުތު ޖާބިރު އެ ގެސްޓްހައުސްގައި ހުންނެވިކަން ޔަޤީންކުރެވިފައެއް ނުވެއެވެ.