އައްޑޫޫޫޫގައި ކުޑަކުއްޖަކަށް ޖިންސީ ގޯނާ ކުރި ފުލުސްމީހާއަށް ދަޢުވާކޮށްފިއެވެ.

މިއަހަރުގެ ސެޕްޓެމްބަރ 13 ވަނަ ދުވަހު ފެންމަތިވެފައިވާ މި މައްސަލާގައި ޢުމުރުން 16 އަހަރުގެ އަންހެންކުއްޖާއަށް ޖިންސީ ގޯނާކޮށްފައިވަނީ ފުލުހުންގެ ވަޒީފާގައި ހުރި ފުވައްމުލަކު މާދަޑު، އޮމާން, އަހުމަދު ނަޒްމީން އެވެ. އެކުއްޖާގެ އުމުރުން 14 އަހަރުން ފެށިގެން ފުލުސް މީހާގެ ފަރާތުން ދިޔައީ ޖިންސީ ގޯނާ ލިބެމުންނެވެ.

ޕީޖީ އޮފީހުން މިއަދު ބުނީ 2020 ވަނަ އަހަރުގެ ކުރީކޮޅުން ފެށިގެން އެކިދުވަސްމަތިން އިތުރުބާރުކުރެވޭ މަގާމެއްގައި ހުރެ އުމުރުން 18 އަހަރު ނުފުރޭ ކުއްޖަކަށް ބިރުދައްކައިގެން އެކުއްޖާގެ އޮރިޔާން މަންޒަރު ދައްކުވައިދޭ ފޮޓޯ ނެގުމަށްފަހު އެފޮޓޯ ބޭނުންކޮށްގެން ބްލެކްމެއިލްކޮށް އެ ކުއްޖާއަށް ޖިންސީ ގޯނާ ކޮށްފައިވާ މައްސަލައިގައި، ޏ.ފުވައްމުލައް، މާދަޑު، އޮމާން، އަހްމަދު ނަޒުމީނުގެ މައްޗަށް ދައުވާ ކުރަން ފޮނުވާފައިވާ ކަމަށެވެ.

އޭނާގެ މައްޗަށް ކުރަނީ ކުޑަކުދިންނަށް ޖިންސީ ގޯނާކުރާ މީހުންނާމެދު ހާއްސަ އުސޫލުތަކަކަށް އަމަލު ކުރުމުގެ ގާނޫނުގެ 9 ވަނަ މާއްދާގެ (ހ) އާ ހަވާލާދީ، އެ މާއްދާގެ (ށ) ގެ ދަށުން، ކުޑަކުއްޖަކު އިތުބާރުކުރަންޖެހޭ މަގާމެއްގައި ހުރި މީހަކު، އެ ކުޑަކުއްޖާއާއެކު ޖިންސީ އަމަލެއް ހިންގުމުގެ ކުށުގެ ދައުވާއެވެ. އެގޮތުން މި ދައުވާ ކުރުމަށް 08 ނޮވެންބަރު 2021 ދުވަހު ސ. ހިތަދޫ މެޖިސްޓްރޭޓް ކޯޓަށް ހުށަހަޅާފައިވާ ކަމަށް ޕީޖީ އޮފީހުން ބުނެއެވެ.

ކުޑަކުއްޖާއަށް ޖިންސީ ގޯނާ ކުރުމުގެ ތުހުމަތާއި ގުޅިގެން އައްޑޫގައި ވަނީ މުޒާހަރާވެސް ކޮށްފައެވެ. އަދި ފުލުސް މީހާ ދިރިއުޅޭ ގެކައިރިއަށް ގިނަ ބަޔަކު އެއްވުމުން މުޒާހަރާ ކުރި މީހުން ހުއްޓުވަން ފުލުހުން ވަނީ ބާރުގެ ބޭނުންވެސް ކޮށްފައެވެ.

ޖިންސީގޯނާގެ މައްސަލަ ފެންމަތިވުމުން ނަޒްމީން ހުރީ ފުލުހުންގެ ވަޒީފާއިން ސަސްޕެންޑް ކޮށްފައެވެ.