މިދިޔަ މަހުގެ 19 ވަނަ ދުވަހު ދަންޖެހިގެން މަރުވިކަމަށް ބުނާ އައިޖީއެމްއެޗްގައި ހީމޯޑަޔަލެސިސް ނަރުހެއްގެ ގޮތުގައި މަސައްކަތްކުރަމުންދިޔަ ފިލިޕިންސްގެ މޭރީ ގްރޭސްގެ ހަށިގަނޑު އޭނާގެ ގައުމަށް ފޮނުވާލައިފި އެވެ.

އައިޖީއެމްއެޗްގައި މަސައްކަތްކުރާ ފިރިހެން ނަރުހަކާ އިނދެގެން ދަރިއެއްވެސް ހުންނަ މިނަރުސް މަރުވިކަމަށް ރިޕޯޓްކޮށްފައިވަނީ މިދިޔަ އޮކްޓޯބަރ މަހުގެ 19 ވަނަ ދުވަހުއެވެ. ފުލުހުން މިއަދު ބުނީ މޭރީ ގްރޭސްގެ ހަށިގަނޑު އާއިލާއާ ހަވާލުކުރަން އިއްޔެ ފިލީޕިންސް އަށް ފޮނުވާފައިވާ ކަމަށާއި، އެ މައްސަލާގައި ހައްޔަރުކޮށްފައިވާ މޭރީގެ ފިރިމީހާގެ ބަންދަށް މިއަދު ވަނީ އިތުރު 15 ދުވަސް ޖަހާފައިކަމަށެވެ.

ޕޯސްޓްމޯޓަމް ހެދުމަށް މޭރީގެ ހަށިގަނޑު މި ނޮވެމްބަރު މަހުގެ 1ގައި އިންޑިއާއަށް ގެންދިއުމަށް ފަހު ރާއްޖެ ގެނައީ ނޮވެމްބަރު 7 ގައެވެ. ފުލުހުން ބުނީ މޭރީގެ މަރުގެ މައްސަލައިގައި ހެދި ޕޯސްޓްމޯޓަމް ރިޕޯޓުން އޭނާ މަރުވީ ދަންޖެހިގެން ކަމަށް ނުބެލެވޭ ކަމަށެވެ. އަދި މަރުވެފައިވަނީ "ބްލަންޓް އިންޖަރީސް" ގެ ސަބަބުން ކަމަށް ފުލުހުން ވަނީ ބުނެފައެވެ.

ފުލުހުން ބުނެފައިވާ ގޮތުގައި އަންހެން މީހާ އުޅޭ ގޭގައި އޭނާ ދަންޖެހިފައި ހުއްޓާ ފެނިގެން ކަމަށް ބުނެ، ރިޕޯޓް ކުރުމުން ފުލުހުން އެތަނަށް ދިއުމުގެ ކުރިން އަންހެން މީހާ ވަނީ ހޮސްޕިޓަލަށް ގެންގޮސްފައެވެ. އަދި އެ މަރަކީ ދަންޖެހިގެން އަމިއްލައަށް މަރުވެފައިވާ މަރެއްނޫންކަމާއި އޭނާ މަރާލާފައި އޮތް ކަމަށް އެންމެ ބޮޑަށް ޝައްކުވީ ދަންޖެހިފައި ހުރި ކަމުގެ ނިޝާނެއް ހަށިގަނޑުން ފެންނަން ނެތުމުން ކަމަށް ބައެއް ރިޕޯޓްތައް ބުނެއެވެ. މީގެއިތުރުންވެސް ޝައްކުވާ ގިނަ ކަންތައްތަކެއް ހުރި ކަމަށްވެއެވެ.

މޭރީގެ މަރުގެ މައްސަލައިގައި ފިރިމީހާ މާވިން ހައްޔަރުކޮށް މައްސަލައިގެ ތަހުގީގު އިތުރަށް ފުޅާ ކުރުމަށްޓަކައި ވަނީ އޭނާގެ ދިވެހި ލޯބިވެރިޔާގެ ފޯނު ހިފަހައްޓާފައެވެ. އައިޖީއެމްއެޗްގައި ނަރުހެއްގެ ވަޒީފާ އަދާކުރާ އެ އަންހެންމީހާ ހުރީ އައިޖީއެމްއެޗްގެ ވަޒީފާ އިންވެސް ސަސްޕެންޑް ކޮށްފައެެވެ.