ވިޔަފާރީގެ ދާއިރާއިން ރާއްޖޭގައި އެންމެ ކުރިއަރާފައިވާ 100 ކުންފުނި ފާހަގަކޮށް ދެވޭ "ގޯލްޑް 100" އެވޯޑް މި އަހަރުވެސް މާލޭ ވޯޓާ އެންޑް ސްވަރޭޖް ކޮމްޕެނީ، އެމްޑަބްލިޔުއެސްސީއަށް ލިބިއްޖެއެވެ.

ކޯޕަރޭޓް މޯލްޑިވްސްއިން އިސްނަގައިގެން ކޮންމެ އަހަރަކު އެއްފަހަރު ބާއްވާ "ގޯލްޑް 100 ގާލާ" ވަނީ ރޭގައި ކްރޮސްރޯޑްސްގައި ބާއްވާފައެވެ. މި ރަސްމިއްޔާތު ޝަރަފްވެރި ކޮށްދެއްވާފައިވަނީ ރައީސުލްޖުމްހޫރިއްޔާ އިބްރާހިމް މުހައްމަދު ސާލިޙެވެ.

ސަރުކާރުގެ އިސްވެރިންނާއި، ރާއްޖޭގެ ވިޔަފާރި ކުންފުނިތަކުގެ އިސްވެރިން ބައިވެރިވެ ވަޑައިގެންނެވި މި ރަސްމިއްޔާތުގައި، އެމްޑަބްލިޔުއެސްސީގެ ފަރާތުން އެވޯޑާ ހަވާލުވެވަޑައިގެންނެވީ އެ ކުންފުނީގެ މެނޭޖިން ޑިރެކްޓަރު ހަސަން ޝާހެވެ. މިއީ އެމްޑަބްލިއުއެސްސީއަށް މި އެވޯޑް ލިބުން ފަސް ވަަނަ ފަހަރެވެ.

އެމްޑަބްލިޔުއެސްސީއަށް ގޯލްޑް އެވޯޑް މިފަހަރު ލިބިފައިވާއިރު، އެ ކުންފުނިން ދަނީ ޒަމާނީ ޓެކްނޮލޮޖީއާއި ވަސީލަތްތައް ބޭނުންކޮށްގެން ރާއްޖޭގައި އެންމެ ފުޅާ ދާއިރާއެއްގައި ފެނާއި ނަރުދަމާއާ ގުޅުން ހުރި ހިދުމަތްތައް ދެމުންނެވެ.

މީގެއިތުރުން، އިންޖީނިއަރިން އާއި މެނުފެކްޗަރިން އަދި ފެނާއި ނަރުދަމާއާ ބެހޭ މުދާ ވިއްކަމުންދާ އެމްޑަބްލިޔުއެސްސީއަކީ މަސްވެރިންނަށް އައިސް ވެސް ފޯރުކޮށްދެމުން އަންނަ ކުންފުންޏެކެވެ.

ފުޅީގައި ބަންދުކުރާ ފެން އުފެއްދުމާއި، ފެނާއި ނަރުދަމާގެ މަސައްކަތްތައް އަދި ފެން ވަޔަރިންއަށް ބޭނުންވާ ހޮޅި އުފެއްދުމުގެ މަސައްކަތްކުރަމުން އަންނަ އެމްޑަބްލިއުއެސްސީ އަކީ ފެން އުފައްދާ އާރްއޯ ފްލާންޓު އަމިއްލައަށް ޑިޒައިންކޮށް ފެބްރިކޭޓް ކުރުމުގެ ގާބިލުކަންވެސް ލިބިގެންވާ ގާބިލް ކުންފުންޏެކެވެ.